नवलपरासी । निधारमा कालोपट्टी बाँधेर संविधानको विरोध गरेको आरोपमा पुर्बी नवलपरासीको कावासोतीबाट प्रहरीले एकजनालाई पक्राउ गरेको छ ।
कावासोतीको फलफूल चोकमा जम्मा भएर संविधान दिवसलाई कालो दिनको रुपमा मनाउन लागेका राजावादी पक्षधरहरुको समूहका एकजनालाई प्रहरीले पक्राउ गरेको हो । पक्राउ पर्नेमा कावासोती २ निवासी इन्द्र सिग्देल रहेका छन् ।
टाउकोमा कालापट्टी बाँधेर संविधान बिरोधि कार्यक्रमको तयारीमा रहेका सिग्देललाई कार्यक्रम शुरु हुनुअघि नै पक्राउ गरिएको प्रहरीले जनाएको छ ।
यस्तै संविधानको विरोध गर्दै काठमाडौँको नयाँ बानेश्वरस्थित संसद् भवन अगाडि प्रदर्शन गरेको आरोपमा ७ जना पक्राउ परेका छन् । उनीहरूलाई संसद् भवनको ३ नम्बर गेट नजिकबाट पक्राउ गरिएको जिल्ला प्रहरी परिसर काठमाडौँका एसपी नवराज अधिकारीले जानकारी दिनुभयो ।
पक्राउ परेकाहरूलाई प्रहरी वृत्त नयाँ बानेश्वरमा राखिएको छ । सरकारले आज विभिन्न कार्यक्रम गरेर संविधान दिवस मनाएको छ । यस्तै विभिन्न समूहले संविधानको विरुद्धमा ठाउं ठाउंमा प्रदर्शन पनि गरिरहेका छन् ।
