बुटवल । बुटवल उपमहानगरपालिकाका प्रमुख खेलराज पाण्डेयले निर्माणका कामको ठेक्का प्रक्रिया पहिलो चौमासिकमै शुरु गर्न कर्मचारीलाई निर्देशन दिनुभएको छ ।
आज (बुधबार) महाशाखा, शाखा प्रमुख र वडासचिवहरुसहितको संयुक्त बैठकमा नगरप्रमुख पाण्डेयले भौतिक पूर्वाधार विकासतर्फका कामको टेण्डर पहिलो चौमासिकमा सक्ने र तेश्रो चौमासिक शुरुमै पूरा गर्ने गरी काम अगाडी बढाउन निर्देशन दिनुभयो । अन्तिम चौमासिकमा काम गर्ने र स्तरीय काम नहुने परिपाटीको अन्त्य गर्नुपर्नेमा जोड दिदै प्रमुख पाण्डेले गत आर्थिक वर्षमा केही सुधार भएको र चालु आर्थिक वर्षमा यसलाई पूर्ण रुपमा सुधार गर्नुपर्ने बताउनु भयो ।
सेवाग्राहीको काममा ढिलासुस्ती गर्ने र आलटाल गर्ने जस्ता गुनासा आउने गरेको भन्दै सेवाग्राहीको काम सकेसम्म छिटो र सरल प्रक्रियाबाट गर्न प्रमुख पाण्डेले कर्मचारीहरुलाई निर्देशन दिनुभयो । उहांले सेवा प्रवाहमा गुनासो नआउने गरी काम गर्न र त्यसअनुसार सूचना र प्रविधिको व्यवस्थापन गर्न निर्देशन दिनुभयो ।
कुनै पनि शाखा महाशाखा र वडाबाट सेवाग्राहीले काम भएन र आलटाल गरियो भन्ने गुनासो गर्नुभएन–उहांले भन्नुभयोे–‘त्यसअनुसार सबै कर्मचारीले काम गर्नुस्, हामीले सेवा दिनका लागि कुनै कमजोरी गर्नुहुन्न ।’ सेवाप्रवाहका क्रममा संघ, प्रदेश र स्थानीय सरकारका कानुनहरुलाई समेत ध्यानमा राख्न र त्यसअनुसार काम गर्न प्रमुख पाण्डेले आग्रह गर्नुभयो ।
जुनसुकै काम गर्दा संघका कानुन, प्रदेशका कानुन र हामीले नगरसभाबाट पास गरेका र कार्यपालिका बैठकबाट पास गरेका कानुन र कार्यविधिहरु राम्रोसँग हेरेर बुझेर मात्र काम गर्न आग्रह गर्दै प्रमुख पाण्डेले काम गरेकै आधारमा कसैले पनि जोखिम बेहोर्ने अवस्था आउन नदिन आग्रह गर्नुभयो । उहांले कार्यसम्पादनका आधारमा कर्मचारीलाई पुरस्कृत र दण्डित गरिने भन्दै सेवाग्राहीलाई पहिलो प्राथमिकतामा राख्न आग्रह गर्नुभयो ।
कामका विषयमा कर्मचारीहरुलाई सचेत बनाउंदै नगर प्रमुख पाण्डेले काम नगरिदिने र प्रमुख, उपप्रमुख र जनप्रतिनिधिलाई दोषी देखाउने वा तर्किने काम नगर्न आग्रह गर्दै काम गर्ने विधि, तरिका र कानुनबारे थाहा नभए आफुभन्दा माथिल्लो अधिकारीलाई सोध्नुस् र तालिम लिन सुझाव दिनुभयो ।
कार्यक्रममा उपप्रमुख सावित्रादेवी अर्यालले सेवाप्रवाहलाई स्तरीय बनाउदै बुटवलको गौरव बढ्ने गरी काम गर्न आग्रह गर्नुभयो । उहांले विकासका काममा विशेष चासो दिएर स्तरीय काम गर्न र गराउनुपर्नेमा जोड दिनुभयो ।
प्रमुख प्रशासकीय अधिकृत मित्रमणि खनालले गुनासो नआउने गरी सेवाप्रवाह गर्न र विकासका कामलाई छिटो र स्तरीय ढंगबाट सम्पन्न गर्नका लागि खटिन कर्मचारीहरुलाई आग्रह गर्नुभयो ।
