बुटवल । आगलागीले पूर्ण रूपमा जलेर नष्ट भएको बुटवलको मिलनचोक स्थित डेल्टा एजुकेशन मार्ट प्रा.लि. यही असार १६ गतेदेखि पुनः सञ्चालनमा आउने भएको छ ।
मार्टका संचालकहरुले आज (सोमबार) आयोजना गरेको पत्रकार सम्मेलनमा मार्टका संचालक चोलाप्रसाद पाठकले आगलागीबाट ४५ करोड रूपैयाँको क्षती भएको प्रारम्भिक आकंलन गरिएको बताउनु भयो । उहांले आगलागीबाट सबै कागजपत्र जलेको र त्यसको विवरण खोजी भइरहेकोले यो क्षतीको आंकलन थोक खरिद मूल्य भएको दावी गर्नुभयो ।
मार्टका अध्यक्ष लोकनाथ उपाध्यायले बुटवलको ठूलो विपत्तिमा सबैको साथ भएपनि नोक्सानी जोगाउन नसकेको बताउनुभयो । तर यस्तो परिस्थितिमा पनि हामीहरु उठेर जानुपर्छ भनेर आंशिक रुपमा डेल्टा संचालन गर्न खोजिएको बताउनुभयो । ‘हामी पहिलो चरणमा यहि असार १६ गतेदेखि एजुकेशन र युनिफर्मसहितको सञ्चालन गर्छौं’, उपाध्यायले भन्नुभयो–‘विस्तारै दशैसम्म, जुत्ताघर, लुगाघर र रेष्टुरेन्ट सञ्चालनमा आउनेछन् भने अरु दशैसम्म संचालन होला ।’
मार्टका अर्का सञ्चालक गणेश पोखरेलले ग्राहक र विद्यार्थीप्रति मार्टले गरेको प्रतिबद्धतालाई डगमगाउन नदिने गरी मार्ट उठ्ने बताउनुभयो । उहांले समयमा दमकल आएको भए आगोले मार्टका धेरै सामान जोगाउन सकिने अवस्था देखिए पनि त्यो हुन नसकेको बताउनुभयो । अब बुटवलमा यस्ता विपत्तिको सामना गर्नेगरी तयारी गर्नुपर्ने उहांले बताउनुभयो ।
