बुटवल । तिलोत्तमा नगरपालिकाले उद्यम ज्ञान तथा रोजगार सूचना मेला कार्यक्रम आयोजना गरेको छ । तिलोत्तमा नगरपालिका वडा नं ९ मंगलापुरमा अवस्थित बोधि भिल्ला प्रा.लि.को हलमा कार्यक्रम गर्न लागिएको हो । नगरपालिकामा आयोजित पत्रकार सम्मेलनमा कार्यक्रम संयोजक तथा वडा अध्यक्ष गणेश पाठकले रोजगार सूचना मेला जेठ २७ गते आइतबार हुने जानकारी गराउनु भयो ।
तिलोत्तमा नगरभित्र रहेका युवा, विद्यार्थी, उद्यमसंग जोडिएका सबैलाई एकै ठाउँमा जम्मा पारेर उद्यमसँग जोडिन उत्प्रेरित गर्ने, उद्यमीहरुको सम्मान र उनीहरुले उत्पादन गरेका वस्तुहरुको प्रदर्शन गरिनुका साथै निजी क्षेत्रसंग सहकार्य गरेर योग्यता, सीप र दक्षता भएका व्यक्तिहरुलाई केही मात्रामा भएपनि रोजगार दिलाउने उद्देश्यले कार्यक्रम गर्न लागिएको संयोजक पाठकले बताउनुभयो ।
बेरोजगार युवायुवतीहरुलाई स्थानीय सरकारले विभिन्न माध्यमबाट स्वदेशमै बसेर स्वदेशकै माटोमा केही गर्न सकिन्छ भन्ने सन्देश प्रवाह गराउन यो कार्यक्रम सबैको लागि प्रभावकारी र अवसर बन्न सक्ने हिसावले सफल हुने नगर कार्यपालिका सदस्य तथा सामाजिक विकास समितिका संयोजक रवी सेन्चुरीले जानकारी गराउनु भयो । उहांका अनुसार अघिल्लो वर्षको कार्यक्रमले युवाहरुलाई रोजगारसंग जोडेको बताउँदै यो वर्ष पनि कार्यक्रम गर्न लागिएको बताउनु भयो ।
युवाहरुलाई लक्षित गरेर आयोजना गर्न लागिएको सो कार्यक्रममा उद्यम गरेका, लघु उद्यमसंग जोडिएका, सफल व्यापारी, उद्योगी, ज्ञान नवप्रबर्तन तथा आइडियाजहरु प्रस्तुत गरिने शिक्षा युवा तथा खेलकुद शाखा प्रमुख तथा नगरपालिकाका निमित्त प्रमुख प्रशासकीय अधिकृत गंगाराम आचार्यले बताउनुभयो । कार्यक्रमलाई सफल बनाउन तिलोत्तमाबासीहरुको सहयोग आवश्यक भएकोले यस कार्यक्रमलाई सुनौलो अवसरको रुपमा लिन संयोजक गणेश पाठकले आग्रह गर्नुभएको छ ।
