तिलोत्तमा स्थित पशुपति कलेजमा नयाँ नेतृत्व चयन

तिलोत्तमा । रूपन्देहीको तिलोत्तमा नगरपालिका १५ कोटिहवामा रहेको पशुपति कलेजमा नयाँ नेतृत्व चयन भएको छ । चैत १० गते भएको कलेजको दोस्रो अधिवेशनबाट लिला बल्लभ गैरेको अध्यक्षतामा नयाँ समिति बनेको हो । उपाध्यक्षमा कृष्णराज कार्की, सदस्यमा कमलप्रसाद बस्याल, खिनु गुरुङ, ध्रुबकुमार पन्थी, संगिता श्रेष्ठ, दिपक गैरे, ध्रुबराज कोइराला र पिताम्बर चापागाईं निर्विरोध निर्वाचित भएको निर्वाचन अधिकृत ताराप्रसाद छन्तेलले जानकारी दिनुभयो ।

निर्वाचन पश्चात् अध्यक्ष लिलाबल्लभ गैरेले सामुदायिक कलेज भएकोले सञ्चालक समितिले मात्रै केही गर्न नसक्ने बताउँदै प्राध्यापक र स्थानीयहरूको साथ सहयोग र सल्लाह अनुसार अगाडि बढ्ने बताउनुभयो ।

कलेजको दोस्रो अधिवेशन तथा चौथो कलेज सभाको उद्घाटन सत्रमा तिलोत्तमा नगरपालिकाका उपप्रमुख जागेश्वरीदेवी चौधरीले तिलोत्तमाको दक्षिणी क्षेत्रमा रहेको कलेज संरक्षण गर्न नगरपालिका सधै सकरात्मक रहेको बताउँदै कार्यक्रम योजनाहरू पेसगरे नगरपालिकाले सक्ने र मिल्ने सहयोग गर्ने प्रतिबद्धता व्यक्त गर्नुभयो ।

क्याम्पस प्रमुख जितबहादुर राजकोटीले सामुदायिक कलेज भएकोले स्थानीय, समाजसेवी, शिक्षा प्रेमीको सहयोगले क्याम्पस अगाडि बढ्ने बताउनुभयो । पशुपति कलेज २०६२ सालमा स्थानीय बुद्धिजीवी र शिक्षा प्रेमीहरूले स्थापना गरेको कलेज हो ।