भैरहवा । जिल्ला प्रहरी कार्यालय रुपन्देही तथा मातहतबाट खटिएको प्रहरी टोलीले चेकजाच गर्ने क्रममा भारतबाट नेपाल तर्फ अबैध रुपमा भन्सार छली चोरी पैठारी गरी ल्याउदै गरेको अवस्थामा ४ लाख बढिको सामान नियन्त्रणमा लिएको छ ।
प्रहरीले जिल्लाका बिभिन्न ठाउंमा चेकजाँचका क्रममा भारतवाट अवैधरुपमा नेपाल भित्राउंदै गरेको अवस्थामा रु ४ लाख २० हजार ३०० बरावरकोे सामान नियन्त्रणमा लिई आवश्यक कारवाहीका लागि भैरहवा भन्सार कार्यालय तथा पशु क्वारेन्टाईन चेक पोष्ट कार्यालय बेलहिया रुपन्देहीमा बुझाएको छ ।
प्रहरीले सिद्धार्थनगर नगरपालिका वडा नं.६ गल्लामण्डीमा बेवारिसे अवस्थामा रहेको थान कपडा १६० मिटर, साडी २० पिस, ब्रा ८१ दर्जन, लेडिज सर्ट ३३ पिस, लेडिज वन पिस टिसर्ट १५ पिस, नेटथान कपडा ३०० मिटर र चिनी ३ बोरा बरामद गरेको छ ।
इलाका प्रहरी कार्यालय बेलहियाबाट खटिएको प्रहरी टोलीले सिद्धार्थनगर नगरपालिका वडा नं. ०१ बेलहियामा चेकजाँच गर्ने क्रममा बेवारिसे अवस्थामा सुट सेट कपडा १७ थान, बलाउज २० थान, बिभिन्न किसिमका बिस्कुट १४ दर्जन, साबुन, हरापत्ता सर्फ लगायत किराना सामाहरु बरामद गरेको छ ।
यस्तै इलाका प्रहरी कार्यालय लुम्बिनीबाट खटिएको प्रहरी टोलीले मायादेवी गाउँपालिका वडा नं. ४ बनकसियाबाट बेवारिसे अवस्थामा रहेको सिमेन्टको पाता १२ फिटको २३ पिस, ८ फिटको ८ पिस र ६ फिटको ८ पिस गरी जम्मा ३९ पिस पाता बरामद गरेको छ ।
इलाका प्रहरी कार्यालय सैनामैना रन्यौराबाट खटिएको प्रहरी टोलीले सैनामैना नगरपालिका वडा नं. ४ कुस्साबाट लु ६० प ५९३५ न.को मोटरसाईकलमा लोड गरी ल्याउंदै गरेको अवस्थामा ३ बोरा चिनी र १ बोरा मैदा मोटरसाईकल सहित नियन्त्रणमा लिएको छ भने प्रहरी चौकी कालिदहबाट खटिएको प्रहरी टोलीले लुम्बिनी सांस्कृतिक नगरपालिका वडा नं. १ खुनगाईबाट भारतबाट अवैध रुपमा भन्सार छली चोरी पैठारी गरी लुकाई छिपाई ल्याउदै गरेको अवस्थामा बोईलर कुखुरा ३९ पिस, दाल १ बोरा र तरकारी लगायतका सामान बरामद गरेको छ ।
