भैरहवा । पशुपति कलेजमा कानुनी साक्षरता तथा लैंगिक सचेतना कार्यक्रम भएको छ । बुधवार रुपन्देहीको तिलोत्तमा नगरपालिका वडा नं. १५ मा रहेको उक्त कलेजमा अध्ययनरत विद्यार्थीहरुका लागि उक्त कार्यक्रम भएको हो ।
कार्यक्रममा बोल्दै क्याम्पस प्रमुख जितबहादुर राजकोटीले नेपाली समाजले अझै महिलाको नेतृत्वलाई सहज रुपमा स्वीकार नगरेको विचार व्यक्त गर्नुभयो । उहाले समाजमा मानसिक हिंसाजन्य घटना बढ्दो रहेको बताउँदै समाजमा रहेका लैङ्गिक आधारमा शारीरिक, मानसिक, सामाजिक, सांस्कृतिक, आर्थिक तथा यौनिक रुपमा असर पर्ने गरी हुने हिंसालाई सधैंको लागि अन्त्य गर्नपर्नेमा जोड दिनुभयो ।
क्याम्पसको विभागिय प्रमुख तथा कार्यक्रम संयोजक कविता भण्डारीले विकसित समाजमा समेत महिलाहरुमाथी हिंसा हुने गरेको बताउँदै महिला हिंसा समाजमा विकृतिको रुपमा रहेको बताउनुभयो । उहाले महिलाहरुमा हुने हिंसाको अन्त्य गर्न जनसचेतना आवश्यक रहेको बताउँदै सामाजिक हिसाको अन्त्य गर्न महिलाले नेतृत्व लिनु पर्नेमा जोड दिनुभयो।
कार्यक्रममा महिला अधिकारकर्मी अमृता अनमोलले प्रशिक्षण दिनुभएको थियो । कलेजले पठनपाठन सँगै अतिरिक्त क्रियाकलाप समेत गर्दै आएको छ ।
