बुटवल । लुम्बिनी प्रदेशमा प्रदेश स्तरिय लन टेनिस संघ गठन भएको छ । लन टेनिसका खेलाडीहरुको आज बुटवलमा भएको सम्मेलनले लन टेनिस खेलाडी संजय प्रकाश श्रेष्ठको अध्यक्षतामा ९ सदस्यीय लुम्बिनी प्रदेश टेनिस संघ गठन गरेको हो ।
प्रदेशका खेलाडीहरुको प्रथम सम्मेलनबाट संघको उपाध्यक्षमा मनोज कुमार बस्नेत, सचिवमा गोपाल ज्ञवाली, कोषाध्यक्षमा सागर थापा तथा सदस्यमा डा. प्रकाश बस्नेत र दया शिवाकोटी शाह सर्वसम्मत चयन हुनुभएको छ ।
संघको आजै बसेको पहिलो बैठकबाट चोम बिक्रम शाह (सुनिल) लाई बिधान सम्मत उपाध्यक्षमा मनोनित गरिएको नवनिर्वाचित प्रदेश सचिव गोपाल ज्ञवालीले जानकारी गराउनु भयो ।
टेनिस खेलाडीहरुको लुम्बिनी प्रदेश सम्मेलनको प्रदेश खेलकुद परिषद लुम्बिनीका सदस्यसचिव जयप्रकाश भट्टराईले आज एक कार्यक्रमका बीच उद्घाटन गर्नुभएको हो । उद्घाटन कार्यक्रममा बोल्दै सदस्य सचिव भट्टराईले साझा अधिकार सूचिमा रहेको खेलकुदलाई बुझेर सहकार्यसहितको गन्त्व्य बनाएर सबै सरोकारवालाहरु अघि बढ्नुपर्नेमा जोड दिनुभयो । खेलकुदलाई साझा अधिकारको सूचिमा पार्नुपर्ने उल्लेख गर्दै उहांले खेलकुद अतिरिक्त क्रियाकलाप कहिलै नहुने र खेलकुद अनिवार्य विधा भएको दाबी गर्नुभयो ।
संयुक्त राष्ट्र संघले खेलकुदलाई शान्ति र विकासको रुपमा परिचय दिएको उदाहरण दिदै सदस्य सचिव भट्टराईले खेलकुद खेल्ने, रमाउने मात्र नभई नाम र दाम कमाउने क्षेत्रका रुपमा स्थापित भएको उल्लेख गर्नुभयो । राज्यको लगानी न्यून हुँदा पनि रुपन्देही खेल विकासमा सधै अग्रसर रहेको उहांले बताउनु भयो ।
कार्यक्रममा नेपाल टेनिस संघका केन्द्रीय उपाध्यक्ष राजु श्रेष्ठले लनटेनिस खेलमा काठमाडौ र पोखरापछि रुपन्देहीमा राम्रो विकास भईरहेको बताउनुभयो । खेलको विकासमा रुपन्देहीको योगदानबारे प्रकाश पार्दै निरन्तर अभ्यास र खेल विकासमा लाग्न उहांले सुझाव दिनुभयो ।
कार्यक्रममा पुर्व जिल्ला शिक्षा अधिकारी तथा नेपाल पौडी संघ, लुम्बिनी प्रदेशका अध्यक्ष टेक बहादुर थापाले खेल सरकारको प्राथमिकतामा पर्ने गरेको बताउनु भयो । राणाकालिन समयमा पारिवारिक मनोरञ्जनका लागि खेलको सुरुवात भएको ईतिहास रहेको उल्लेख गर्दै उहांले लनटेनिस खेल काठमाडौं केन्द्रीत रहेपनि छोटोसमयमा नै देशका मुख्य शहरहरुमा विकास भएको दाबी गर्नुभयो ।
कार्यक्रममा रुपन्देही जिल्ला लनटेनिस संघका उपाध्यक्ष डा मनोज ढुगाना, खेलकुद पत्रकार मञ्चका अध्यक्ष सुमन अधिकारी, सल्लाहकार अब्दुल सहमतले नयाँ ढंगबाट संस्थालाई योजनाबद्ध रुपमा अघि बढाउनुपर्ने सुझाव दिनुभयो ।
