काठमान्डौ । राष्ट्रिय सभा निर्वाचनका लागि आज मनोनयन दर्ता हुँदछ ।
निर्वाचन आयोगले उम्मेदवारी दर्ताका लागि आज बिहान १० बजेदेखि दिउँसो ३ बजेसम्मको समय तोकेको छ। आयोगको कार्यतालिका अनुसार आजै उम्मेदवारको सूची प्रकाशन हुने छ ।
आयोगका अनुसार भोलि उम्मेदवारको विरोधमा उजुरी दिन सकिने छ भने पुस २५ र २६ गते मनोनयन पत्र र उजुरीमाथि जाँचबुझ गरी निर्णय गर्ने कार्यक्रम छ। पुस २६ गते उम्मेदवारको नामावली प्रकाशन हुनेछ ।
नामावली उपर दाबी विरोधको सूचना दिन आयोगले भोलि बिहान १० देखि ४ बजेसम्मको समय तोकेको छ। मनोनयनपत्र र उजुरी पत्रमा जाँचबुझ गरी आयोगले पुस २५ गते उम्मेदवारीबारे निर्णय गर्नेछ भने पुस २६ गते पुनः नामावली सार्वजनिक गर्नेछ।
आयोगले उम्मेदवारलाई आफ्नो नाम फिर्ता लिनका लागि पुस २७ गते बिहान १० बजेदेखि दिउँसो १ बजेसम्मको समय तय गरेको छ भने सोही दिन २ बजेसम्म आयोगले उम्मेदवारहरुको अन्तिम नामावली प्रकाशन गर्नेछ।
पुस २८ गते आयोगले उम्मेदवारलाई निर्वाचन चिह्न प्रदान गर्नेछ भने राष्ट्रिय सभाका लागि माघ ११ गते मतदान हुने कार्यतालिका छ।
