बुटवल । पेट्रोलियम पदार्थ ढुवानी गर्ने ट्याँकर व्यवसायीहरुले समय सापेक्ष ढुवानी भाडा दर समायोजन गर्न सरकारसंग माग गरेका छन् ।
पश्चिमाञ्चल ट्याँकर व्यवसायी समितिको १६ औं वार्षिक साधारण सभामा बोल्दै ब्यवसायीहरुले नेपाल आयल निगमले बटम लोडिङ प्रणालीबाट ढुवानी गर्नुपर्ने प्रावधान लागु गर्दा व्यवसायीको प्रति ट्याँकर लाखौं अतिरिक्त खर्च हुने भएकाले भाडा दर समायोजन नगरे व्यवसायी संकटमा पर्ने बताए ।
सो अवसरमा नेपाल आयल निगम प्रादेशिक डिपो भलबारीकी प्रमुख कमला न्यौपानेले वातावरणीय संरक्षण र ढुवानीका क्रममा हुने नोक्सानी रोक्न इण्डियन आयल कर्पोरेसनले यो प्रणाली अनिवार्य गरेकाले नेपाल आयल निगमले पनि लागु गर्नुपर्ने वाध्यता रहेको बताउनु भयो । उहांले व्यवसायी र सरकार सहकार्य र समन्वय गरेर अघि बढे मात्रै आपुर्ति सहज हुने बताउनु भयो ।
ट्याँकर व्यवसायी महासंघ र निगमबीच वार्ता र संवादबाट यो समस्याको निकास निकाल्न सकिने उहाँले बताउनु भयो् ।
कार्यक्रममा पश्चिमाञ्चल ट्याँकर व्यवसायी समितिका प्रमुख सल्लाहकार चोपनारायण श्रेष्ठले भाडा समायोजन नगरी बटम लोडिङ प्रणाली लागु गर्न नसकिने बताउनु भयो । बटम लोडिङमा जांदा एउटा ट्याँकर २० लाख रुपैयां बढी अतिरिक्त खर्च हुने श्रेष्ठले बताउनु भयो । उहांले व्यवसायिक एकताले मात्रै व्यवसायीले उठाएका माग सम्बोधन गराउन सरकारलाई दबाव दिन सकिने बताउनु भयो ।
समितिका अध्यक्ष राकेश कुमार कसौधनको अध्यक्षतामा भएको कार्यक्रममा पश्चिमाञ्चल पेट्रोलियम डिलर्स एशोसिएसनका अध्यक्ष हिमाल गैरे, समितिका महासचिव भुपराज अर्याल, सह महासचिव प्रेम जीएम, कोषाध्यक्ष धनेन्द्र पौडेल, डा.शान्तकुमार शर्मा, चालक तथा परिचालक संघका संयोजक नवराज पाण्डे लगायतले बोल्दै चर्को बैंक ब्याज दर आर्थिक मन्दी जस्ता कारणले व्यवसायीहरु संकटमा परेकाले उनीहरुका माग प्रति सरकार संवेदनशील हुनुपर्ने बताउनु भयो ।
