बुटवल । सामुदायिक वनको संरक्षण गरी दीगो विकासका लागि उपभोक्ता सक्रिय र सचेत हुनुपर्ने सरोकारवालाले बताएका छन् । मानव समाजमा वनको महत्व बढेकाले हरियाली र शुद्व हावापानीका लागि सामुदायिक वनहरु संरक्षण गरी दीगो विकासमा सबैको ध्यान केन्द्रित हुनुपर्ने उनीहरुले बताए ।
रुपन्देहीको तिलोत्तमास्थित शंकरनगर सामुदायिक वन उपभोक्ता समूहको २३ औं वार्षिक साधारण सभामा बोल्ने सरोकारवालाले सामुदायिक वनको दीगो विकासले समाजमा परिवर्तन आउने बताए ।
सामुदायिक वनको दीगो विकास भएमा रोजगारी सिर्जना हुने र यसबाट गरिबी निवारण गर्न सकिने उनीहरुको भनाइ छ । तीनै तहका सरकारवीच वन ऐनहरु बाझिएकाले काम गर्न समस्या भएको भन्दै उनीहरुले सामुदायिक वनलाई लगाईएको कर हटाउन सरकारसंग माग गरेका छन् ।
साधारण सभामा बोल्दै तिलोत्तमा नगरपालिकाकी उपमेयर जागेश्वरी देवी चौधरीले वन ऐनसंग बाझिएका विषयमा सहजीकरण गरी वनको दीगो विकासमा सहयोग पुराउने बताउनुभयो ।
आमनागरिकको हितमा सामदुायिक वन संरक्षण गर्नुपर्ने बताउंदै उपमेयर चौधरीले सामुदायिक वनलाई अतिक्रमण हुनबाट जोगाइ संरक्षणका लागि तिलोत्तमा नगरपालिकाको साथ सहयोग रहने प्रतिवद्वता जनाउनुभयो ।
डिभिजन वन कार्यालय रुपन्देहीका डिभिजन प्रमुख प्रभात सापकोटाले सामुदायिक वनहरु उत्कृष्ट र सम्मृृद्व भैसकेको बताउंदै सामुदायिक वनको दीगो विकासमा सबैको साथ सहयोग चाहिने बताउनुभयो ।
शंकर नगर सामुदायिक वन उपभेक्ता समूहका अध्यक्ष रबिन्द्र वस्नेतले देशभरका सामुदायिक वनमध्ये शंकनर सामुदायिक वन उत्कृष्ट भएको बताउनुभयो । अतिक्रमित हुनबाट शंकरनगर सामुदायिक वनलाई जोगाईएको बताउंदै उहांले भन्नुभयो– भविश्यमा अतिक्रमण हुनबाट जोगाउनका लागि आम उपभोक्ता सचेत हुनु जरुरी छ । सामूदायिक वनलाई रोजगार र पर्यापर्यटनसंग जोडेर आम्दानीको श्रोत बढाउन सकिने र त्यसतर्फ काम भैरहेको अध्यक्ष बस्नेतले बताउनुभयो ।
कार्यक्रममा नेपाली कांगे्रसका तिलोत्तमा नगर सभापति हरिलाल पाण्डे, नेकपा एमाले तिलोत्तमा नगर अध्यक्ष तामनाथ पाण्डे, नेकपा माओवादी केन्द्रका नगर इन्चार्ज वेलप्रसाद शर्मा, तिलोत्तमा नगरपालिका वडा नम्बर १ का वडाध्यक्ष फर्सुराम गिरी, रामनगर सामुदायिक वनका अध्यक्ष रुद्र हमाल, शंकरनगर खानेपानी उपभोक्ता समूहका अध्यक्ष झविन्द्र भण्डारी, शंकरनगर सामूदायिक वनका कानुनी सल्लाहाकार खुमाकान्त पौडेल, शिक्षक टंकप्रसाद पौडेल, इको क्लवकी अध्यक्ष मेलिना गुरुङ, पार्षद शारदा भण्डारी, लोकनाथ पाण्डेय लगायतले बोल्दै सामुदायिक वन संरक्षणमा सबैको साथ सहयोग आवश्यक पर्नेमा जोड दिए ।
साधारण सभाको अवसरमा एसईईमा उत्कृष्ट विद्यार्थीलाई छात्रवृत्ति र गरिव तथा जेहेन्दार विद्यार्थीलाई संस्थाका पदाधिकारीहरु अध्यक्ष रबिन्द्र बस्नेत, उपाध्यक्ष कमला ज्ञवाली, सचिव कालिका अधिकारी र कोषध्यक्ष भुवन आचार्यले आर्थिक सहयोग गर्नुभएको छ । यो सहयोलाई आफ्नो कार्यकाल सम्म निरन्तरता दिइने कार्यक्रममा जानकारी गराइएको थियो । कार्यक्रममा अध्यक्ष रविन्द्र वस्नेतले वार्षिक प्रतिवेदन र कोषाध्यक्ष भुवन आचार्यले आर्थिक प्रतिवेदन प्रस्तुत गर्नुभएको थियो ।
शंकर नगर सामुदायिक वन उपभोक्ता समूहका अध्यक्ष रबिन्द्र वस्नेतको अध्यक्षता, उपाध्यक्ष कमला ज्ञवालीको स्वागत र सचिव कालिका अधिकारीको सञ्चालनमा कार्यक्रम भएको थियो ।
