भैरहवा । नक्कली शरणार्थी प्रकरणमा पक्राउ परी कानुनी कठघरामा रहेका कांग्रेस नेता बालकृष्ण खाँणले न्याय पाउनेमा आशावादी रहेको नेपाली कांग्रेसका सभापति शेर बहादुर देउवाले बताउनु भएको छ ।
मंगलबार रुपन्देहीको भैरहवामा नेपाली कांग्रेस रुपन्देहीको प्रथम जिल्ला सम्मेलनलाई सम्बोधन गर्दै सभापति देउवाले खाँणले न्याय पाउनेमा आफु आशावादी रहेको बताउनु भयो । भैरहवा समेत पर्ने रुपन्देही क्षेत्र नम्बर ३ बाट प्रतिनिधि सभाका लागि उम्मेदवारी दिएका कांग्रेस नेता बालकृष्ण खाँणलाई नियोजित रुपमा फसाईएको आरोप कार्यकर्ताहरुले लगाएका थिए ।
खाँणको मुद्धा अदालतमा बिचाराधिन रहेको कारण धेरै बोल्न नहुने बताउदै पूर्व प्रधानमन्त्री समेत रहेका सभापति देउवाले तर पनि आफुलाई खाँणले न्याय पाउने विश्वास रहेको बताउनु भयो ।
फरक प्रसंगमा बोल्दै सभापति देउवाले भैरहवा स्थित गौतमबुद्ध अन्तर्राष्ट्रिय विमानस्थल सञ्चालनका लागि पहल गर्ने समेत बताउनु भयो । सभापति देउवाले विमानस्थल सञ्चालनका लागि सरकार र सरोकारवाला सबै पक्षसँग परामर्श गर्ने बताउनु भयो ।
कार्यक्रममा पार्टीका सहमहामन्त्री किशोर सिंह राठौरले रुपन्देहीमा काँग्रेस बलियो शक्ति भएपनि कार्यकर्ताहरुमा कुरा सुन्ने सम्मको फुर्सद नहुँदा र पार्टीको संगठन निर्माणमा ध्यान नदिँदा कमजोर हुँदै गएको गुनासो गर्नुभयो । उहाले अर्कालाई दोष दिएर पार्टी नबन्ने बताउनुभयो ।
केन्द्रीय सदस्य एवं सांसद डा.चन्द्र भण्डारीले काँग्रेसमा अन्तर्घात बढिरहेको र यसले पार्टीलाई कमजोर बनाएको बताउनु भयो ।
नेपाली कांग्रेस लुम्बिनी प्रदेशका मुख्यमन्त्री डिल्लीबहादुर चौधरीले संविधानको मूल मर्म अनुसार अधिकार प्राप्त नहुँदा प्रदेश सरकार ‘पंगु’ बनेको उल्लेख गर्नुभयो । मंगलवार नेपाली कांग्रेस रुपन्देहीको प्रथम जिल्ला सम्मेलनलाई सम्बोधन गर्दै मुख्यमन्त्री चौधरीले प्रदेश सरकारलाई अधिकार दिए प्रदेशको बिकासका लागि कुनै समस्या नरहेको बताउनु भयो । उहाँले संघियताको मर्म अनुसार प्रदेशलाई अधिकार दिए देशको बिकास सजिलो सँग गर्न सकिने दावि गर्नु भयो ।
नेपाली कांग्रेस रुपन्देहीका सभापति रामकृष्ण खांडको सभापतित्वमा भएको कार्यक्रममा नेपाली कांग्रेसका केन्द्रिय सदस्यहरु दिपक गिरी, अब्दुल रज्जाक, भरत कुमार शाह, देवेन्द्रराज कंडेल, गंगा शाही, जिल्ला उपसभापति थानेश्वर घिमिरे, सचिव हरि काफ्ले, कोषध्यक्ष हरि अर्याललगायतले बोल्दै नेपाली कांग्रेसलाई बलियो बनाउने गरी नेतृत्वमा रहने हरुले काम गर्न सुझाव दिनु भयो ।
