भैरहवा । भैरहवामा पाँच करोड रुपैयाँको लगानीमा ‘साँवरिया’ सञ्चालनमा आउँदैछ । सिद्धार्थनगर नगरपालिका वडा नम्बर ७ स्थित आवारोडमा ‘एजी कृष्ण फुड प्रोडक्टस प्रा.लि.’को ‘साँवरिया’ ब्राण्ड सञ्चालनमा आउन लागेको बिहीबार पत्रकार सम्मेलन गरी सञ्चालकले जानकारी गराएका छन् ।
‘साँवरिया’ भदौ २४ गते आइतबार उद्घाटन गरिने सञ्चालक अरुण कुमार अग्रवालले जानकारी गराउनु भयो । ‘साँवरिया’ एजी कृष्ण फुड प्रोडक्टस प्रा.लि.को पहिलो व्यवसायिक प्रतिष्ठान भएको उहांले बताउनु भयो ।
भारतलगायत विभिन्न मुलुकबाट बुद्ध जन्मस्थलसँगै लुम्बिनी प्रदेशका विभिन्न आध्यात्मिक धाम घुम्न आउने पर्यटक लक्षित गरेर शुद्ध साकाहारी र जैन परिकार उपलब्ध गराउन ‘एजी कृष्ण फुड प्रोडक्टस प्रा.लि.’ले ‘साँवरिया’ ब्राण्ड प्रस्तुत गरेको अग्रवालले बताउनु भयो । अग्रवालले भन्नुभयो– ‘साँवरियामा गुणस्तरीय मिठाईका साथै विभिन्न प्रकारका खाजाहरु उपलब्ध छन् ।’
अग्रवालका अनुसार आकर्षक सजावट र ग्राहकको सुविधालाई मध्यनजर गरेर सञ्चालनमा ल्याइएको यो व्यवसायिक प्रतिष्ठानमा विभिन्न प्रकारका उच्च गुणस्तरका मिठाई, प्रभातकालीन नास्ता, दिउँसोको खाजा उपलब्ध रहेका छन् । साँवरियामा ग्राहकको चाहनाअनुसार यहाँ दक्षिण भारतीय खाजाकासाथै चिनीयाँ स्वादका परिकार उपलब्ध हुनेछन् ।
‘साँवरिया’मा अरुण अग्रवालसहित कृष्णप्रसाद शर्मा (सानु), ज्ञानेन्द्र कार्की, गौरव दारुका र आदर्श अग्रवालको व्यवसायिक साझेदारी रहेको छ ।
पूर्ण वातानुकूलित साँवरियामा एकैपटक १३० जनालाई सेवा प्रदान गर्ने व्यवस्था मिलाइएको अग्रवालले बताउनु भयो । साथै कार्यक्रम हलको समेत सुविधा रहेको छ । यहाँ आउने पाहुनाका लागि नजिकै सानु डिपार्टमेन्टलमा पार्किङ सुविधा समेत रहेको अग्रवालले बताउनु भयो ।
‘साँवरिया’ले आगामी दिनमा पारिवारिक र संघ–संस्थाले आयोजना गर्ने भोजमा क्याटरिङ सुविधा समेत उपलब्ध गराउने छ । यहाँ उपलब्ध सम्पूर्ण मिठाईका परिकारको ‘होम डेलिभरी’ सुविधा पनि थप गरिने पत्रकार सम्मृलनमा संचालक ज्ञानेन्द्र कार्कीले बताउनु भयो । कार्कीका अनुसार शुद्धता, गुणस्तर र सरसफाइलाई प्राथमिकता दिइएको छ । अनुभवी जनशक्तिले तयार गर्ने मिठाईमा शुद्ध घिउको प्रयोग गरिने बताइएको छ । साँवरियामा ५१ जनाले प्रत्यक्ष रोजगारी पाएका छन् ।
नाफामुलक भन्दा सेवा भावनाले यसको सुरुवात गरिएकाले आगामी दिनमा सामाजिक सुरक्षा दायित्वमार्फत मुनाफाको निश्चित प्रतिशत रकम सामाजिक कार्यमा खर्च गरिने संचालक अग्रवालले बताउनु भयो । ‘आगामी दिनमा ग्राहकको अपेक्षा र मागअनुसार हाम्रो ब्राण्डलाई मुलुकका विभिन्न सहरमा ‘चेन’का रूपमा विस्तार गरिनेछ,’ अग्रवालले भन्नुभयो ।
