कपिलवस्तु । महिला कर्मचारी माथि बलात्कारको प्रयास गर्ने कपिलवस्तुका स्वास्थ्य प्रमुखसहित २ जना पक्राउ परेका छन् । जिल्लाको शिवराज नगरपालिकाले संचालन गरेको आधारभुत स्वास्थ्य सेवा अस्पताल चन्द्रौटाका प्रमुख लेखनाथ पौडेल र शिवराज नगरपालिका– ३ बस्ने भुवन पाण्डेलाई पक्राउ गरिएको वडा प्रहरी कार्यालय चन्द्रौटाका प्रहरी निरीक्षक शेखरजंग मल्लले जानकारी दिनुभयो ।
पौडेल र पाण्डेले यही साउन १२ गते राती मदिरा सेवन गरेर डिउटीमा खटिएका महिला कर्मचारी माथि बलात्कारको प्रयास गरेको भन्दै पीडित महिलाले प्रहरीमा उजुरी दिएको प्रहरीले जनाएको छ । महिलाले प्रहरीमा उजुरी दिएपछि आरोपित दुबै जना फरार भएका थिए । फरार रहेका आरोपीलाई लुकेर बसेको अवस्थामा छुट्टाछुट्टै स्थानबाट पक्राउ गरिएको प्रहरीले जनाएको छ ।
पक्राउ परेका आरोपितहरुलाई सोमबार जिल्ला अदालत कपिलवस्तुबाट म्याद थप गरी कानुनी प्रक्रिया आगाडी बढाइएको वडा प्रहरी कार्यालय चन्द्रौटाका प्रहरी निरीक्षक मल्लले बताउनु भयो । नगरपालिकाले प्रहरीमा उजुरी परेसँगै शिवराज नगरपालिकाले स्वास्थ्य प्रमुख पौडेललाई जिम्मेवारीबाट हटाएको थियो । पौडेललाई नगरपालिकाले साउन २ गते मात्रै जिम्मेवारी दिएको थियो ।
