बुटवल उद्योग वाणिज्य संघमा व्यवसाय विकास सेवा केन्द्र स्थापना हुने

बुटवल । बुटवल उद्योग वाणिज्य संघ रुपन्देहीमा व्यवसाय विकास सेवा केन्द्र स्थापना हुने भएको छ । उद्यमशिलता विकासको लागि साना तथा मझौला उद्योगी व्यवसायीलाई आईपर्ने समस्या, नवउद्यमशिलता विकासमा सहजिकरण लगायतका उद्यमीका समस्या समाधामा सहजिकरण गर्नको लागि व्यवसाय विकास सेवा केन्द्र स्थापना गर्न लागिएको हो ।
अन्तरप्रेरणा, आध्यान्त र वल्र्ड स्टार्टअपले संयुक्त रुपमा सञ्चालन गरेको रुफ अफ द वल्र्ड परियोजना अन्तरगत बुटवलमा व्यवसाय विकास सेवा केन्द्र सञ्चालन गर्न लागिएको रुफ अफ द वल्र्ड परियोजनाकी परियोजना व्यवस्थापक रक्षा चालिसेले जानकारी गराउनु भयो ।
यो परियोजना अन्तरगत बुटवलमा व्यवसाय विकास सेवा केन्द्र तीन वर्षसम्म चल्नेछ । परियोजना सञ्चालन गर्ने विषयमा बुटवल उपमहानगरपालिका, बुटवल उद्योग वाणिज्य संघ र लुम्बिनी वाणिज्य क्याम्पसको सहकार्यमा अन्तरप्रेरणाको आयोजनामा सोमबारदेखि दुई दिने रणनीतिक योजना निर्माण कार्यशाला सुरु भएको छ ।
कार्यशालामा अन्तरप्रेरणाका कन्सल्ट्यान्ट डा. रामजी न्यौपानेले सहजिकरण गर्नुभएको छ । नेपाली उत्पादन निर्यातमा भएका समस्या, आन्तरिक बजारको अवस्था, व्यवसाय विकास सेवा केन्द्रबाट दिन सकिने सेवाहरु लगायतका विषयमा छलफल गरिएको बुटवल उद्योग वाणिज्य संघ रुपन्देहीका अध्यक्ष उज्ज्वलप्रसाद कसजूले जानकारी गराउनु भयो । कार्यशालाले तीन वर्षे कार्यक्रमको कार्ययोजना निर्माण गरेर भोली मंगलबार सकिने बुटवल उद्योग वाणिज्य संघका कार्यकारी निर्देशक मदनकुमार कार्कीले जानकारी गराउनु भयो ।