सिद्धार्थनगरले बृद्धि गरेको एकीकृत सम्पत्ति कर सच्च्याउन नागरिक अभियानको माग

भैरहवा । सिद्धार्थनगर नगरपालिकाले एकीकृत सम्पत्ति कर वृद्धि गरेको भन्दै स्वतन्त्र नागरिक अभियानले एकीकृत सम्पत्ति करमा पुरानै दर कायम गर्न माग गरेको छ ।
आइतबार नगरप्रमुख इश्तियाक अहमद खानलाई ज्ञापनपत्र बुझाउँदै अभियानले जनताको भावनाअनुसार एकीकृत सम्पत्ति कर वृद्धि गर्ने निर्णय सच्याएर पुरानै दर कायम गर्न माग गरेको हो ।
अभियानका संयोजक नारायणप्रसाद भण्डारीले एकीकृत सम्पत्ति कर अस्वाभाविक रुपमा बढाइएकाले यसलाई घटाउनुपर्ने माग राखेर नगरपालिकालाई ज्ञापन पत्र बुझाइएको बताउनु भयो ।
सिद्धार्थनगर नगरपालिकाले यसै आर्थिक वर्ष २०८०÷०८१ साउन देखि लागू हुने गरी नगरवासीहरुबाट लिँदै आएको एकीकृत सम्पत्ति कर अस्वभाविक रुपमा वृद्धि गरेको उहांले बताउनु भयो । जनसमुदायस्तरबाट जानकारी पाए अनुसार ७ सयदेखि १ हजार २ सय प्रतिशत सम्म कर वृद्धि गरिएको देखिएको भन्दै जनगुनासोको आधारमा निर्णय सच्याउन नगरपालिकालाई अपील गरेको बताउनु भयो ।
आर्थिक मन्दीले थला परेको अवस्थामा जनताको मत लिएर जनताको काममा राहत हुने किसिमको योजना दिनुपर्नेमा एकाएक करको दर समेत अस्वभाविक रुपले वृद्धि गर्ने नीति ल्याउनु राम्रो नभएको भण्डारीको भनाइ छ ।
पुरानै करको दर कायम नगरे चरणबद्ध आन्दोलन गर्ने र नगरका सम्पूर्ण कर अवज्ञा गर्ने ज्ञापनपत्रमा चेतावनी दिइएको छ ।
सिद्धार्थ नगरपालिकाका नगरप्रमुख खानले कर सम्बन्धी माग छिटो भन्दा छिटो सम्बोधन गर्ने प्रतिक्रिया दिनुभयो । सिद्धार्थनगर नगरपालिका जनतासंग सम्बन्धित कार्यालय भएकाले जनताको भावना विपरित जान नसक्ने उहांका भनाइ छ ।