बुटवल । रुपन्देही उद्योग संघले बिना दर्ता संचालित उद्योग व्यवसायलाई कानूनी दायरामा ल्याउन माग गरेको छ ।
बुटवल आसपास तथा रुपन्देही जिल्लाका विभिन्न बजार क्षेत्रमा व्यापक रुपमा बिना दर्ता घुमन्ते टोली बनाई घर तथा पसलमा पुगेर फर्निचर उद्योगहरु संचालन भइरहेको भन्दै संघले त्यस्ता गतिविधि रोक्न आग्रह गरेको छ ।
संघले शुक्रबार एक विज्ञप्ती जारी गरी कानुनी दायरा भन्दा बाहिर रही समूह समेत खडा गरी औद्योगिक गतिविधि संचालन गर्नाले नियम संगत संचालित उद्योगहरु प्रभावित बनेका र देशको राजस्व संकलनमा समेत प्रभाव परेको उल्लेख गरेको छ ।
संघले कानून विपरित कुनै पनि औद्योगिक कार्य नगर्न र बिना दर्ताका कामदारहलाई प्रोत्साहित नगर्न उपभोक्ताहरुलाई समेत आग्रह गरेको छ ।
संघका अध्यक्ष माधवप्रसाद पौडेल तथा महासचिव हरिबहादुर खत्रीले जारी गरेको विज्ञप्तीमा बिना दर्ता संचालित उद्योग व्यवसायलाई कानूनी दायरामा ल्याउन सम्बन्धित निकायको ध्यानाकर्षण गराइएको छ ।
