बुटवल । जबरजस्ती करणी गरेको भिडियो बनाई भाइरल गर्दिन्छु भन्दै महिलालाई धम्की दिने एक युवालाई पाल्पा प्रहरीले पक्राउ गरेको छ ।
महिलालाई डर त्रास देखाई धम्की दिने बुटवल उप–महानगरपालिका वडा नं. ९ बस्ने बर्ष २४ को आशिष सुनारलाई पक्राउ गरिएको जिल्ला प्रहरी कार्यालय पाल्पाले जनाएको छ ।
सुनारले गएको बैशाख ५ गते बिहान पाल्पा तानसेन नगरपालिका वडा नं. ३ भगवतीटोल स्थित एक होटलमा रुपन्देहीकै २५ वर्षीय महिलालाई करकापमा पारी डर त्रास देखाई जबरजस्ती करणी गरी करणी गरेको भिडियो बनाएर पटक– पटक फोन तथा म्यासेज गरी डर त्रास देखाई आफुलाई भेट्न नआए करणी गरेको भिडियो भाइरल गर्ने धम्की दिने गरेको खुल्न आएको प्रहरीले जनाएको छ ।
यही साउन ९ गते बिहान आशिष सुनारले पिडित महिलालाई फोन गरी जिल्ला रुपन्देही बुटवल उप–महानगरपालिका वडा नं. ११ माझगाउँ बोलाई सोही स्थानमा रहेको सानदार होटलमा लगि जबरजस्ती करणी गरेको प्रहरीले जनाएको छ ।
शुक्रबार जिल्ला प्रहरी कार्यालय पाल्पामा पिडित महिलाले लिखित जाहेरी दिएसँगै पाल्पाबाट प्रहरी अनुसन्धान अधिकृत सहित खटिएको टोलीले ईलाका प्रहरी कार्यालय बुटवलसँग समन्वय गरी आशिष सुनारलाई रुपन्देहीको बुटवलबाट नियन्त्रणमा लिएको थियो ।
