सालझण्डी । ईलाका प्रहरी कार्यालय सालझण्डी, रुपन्देहीले लागु औषध खैरो हेरोईन सहित ४ जनालाई पक्राउ गरेको छ ।
सैनामैना नगरपालिका वडा नं. १० सालझण्डी बजारमा लागु औषध खैरो हेरोईनको खरिद बिक्री कारोवार भईरहेको छ भन्ने सूचनाको आधारमा ईलाका प्रहरी कार्यालयबाट खटिएको प्रहरी टोलीले २५६० मिलिग्राम लागु औषध खैरो हेराइन सहित ४ जनालाई पक्राउ गरेको हो ।
प्रहरीले साउन ८ गते सोमबार सैनामैना नगरपालिका वडा नं.१० सालझण्डी बजार स्थित ड्याम साईडमा लागु पदार्थ खरिद बिक्री गरिरहेको अबस्थामा कञ्चन गाउँपालिका वडा नं.५ बस्ने बर्ष १८ को प्रतिक थापा, सैनामैना नगरपालिका वडा नं.१० बस्ने बर्ष २६ को पट भन्ने सुनिल थारू, सोही स्थान बस्ने बर्ष २८ को जिसस भन्ने जित बहादुर दर्लामी र बर्ष २५ को डि के भन्ने दिनेश कुमार पुन समेतलाई पक्राउ गरेको हो । उनीहरुको साथबाट ३२ थान पुडियामा २५६० मिली ग्राम लागु औषध खैरो हेरोईन बरामद भएको प्रहरीले जनाएको छ ।
