तिनाउ र दानव नदीको बाढीमा फसेका दुईजनाको उद्धार

सतर्कता अपनाउन बुटवल नगरको आह्वान, खाँणद्वारा कटान क्षेत्रको अवलोकन

बुटवल । बुटवलको तिनाउ र दानव नदीमा फसेका दुईजनाको उद्धार गरिएको छ ।
बुटवल मजुवास्थित तिनाउ नदिको बीचमा माछा मार्न गएका पाखापानीका ६४ वर्षीय मिनबहादुर गाहा दाउरा खोज्न जांदा दानव नदीमा फसेका बुटवल–१४ कैलाशनगरका जनक घर्तीलाई उद्धार गरिएको हो । उनीहरुलाई नगर प्रहरी, शसस्त्र प्रहरी र स्थानीयको प्रयासमा सकुसल उद्धार गरिएको हो ।
तिनाउमा नदीको सतह बढेकाले दाउरा, माछा मार्ने उद्देश्य वा खोला हेर्ने उद्देश्यले खोलामा नजान सबैमा अनुरोध गरेको बुटवल उपमहानगरपालिकाका प्रमुख खेलराज पाण्डेयले बताउनुभयो । उहाँले नदी किनारमा विपदको टोली र नगरप्रहरी खटाएर सावधानी अपनाईएको बताउनुभयो । नदिकिनार क्षेत्रमा नगरप्रहरीले माईकिङ गर्दै सावधानी र सतर्कता अपनाउन आह्वान गरेको छ ।
यस्तै मंगलबार बिहान तिनाउ नदी उर्लेर नदीको दायाँ बायाँको किनार कटान गरेपछि तिलोत्तमा नगरपालिकाका प्रमुख रामकृष्ण खाँण सहितको टोलीले तिनाउ नदी र  कटान क्षेत्रको अवलोकन गरेको छ । तिलोत्तमाको मगरघाट पुलको उत्तर र दक्षिणतर्फको भाग नदीले कटान गरेकाले नगरप्रमुख खाँण सहितको टोली नदी कटान क्षेत्रमा पुगी सो क्षेत्रको अवलोकन गरेको हो ।

तिलोत्तमा नगरप्रमुख खाँण सहित युवा नेता महेश केसी, तिलोत्तमा ३ का वडाध्यक्ष कल्याण पौडेल, सदस्य विष्नु थापा, वडा नम्वर ४ का वडाध्यक्षका प्रत्यासी गोबिन्द भुसाल, निर्माण ब्यवसायी अजय राना, नारायण पाण्डे, रमेश गैरेलगायतको टोलीले कटान क्षेत्रको अवलोकन गरी दीर्घकालिनरुपमै कटान नियन्त्रण गर्ने हिसावले काम गर्नुपर्ने विषयमा छलफल गरिएको थियो ।

यसैगरी रुपन्देहीकै सैनामैनामा डुवानमा परेको घर परिवारलाई उद्धार गरी सुरक्षित बासस्थानमा राखिएको छ । सैनामैना–८ रामापुरमा डुबानमा परेका स्थानीय शंखमुनि थारुको घर परिवारलाई उद्धार गरी सुरक्षित ठाउँमा राखिएको हो । सोही वडामा रहेको सतचिन्तन प्रतिष्ठानको भवन पनि डुबानमा परेको छ ।
स्थानीय इङ्गुरिया नदीमा आएको बाढी पसेपछि डुवानमा परेको ईलाका प्रहरी कार्यालय सालझण्डीले बताएको छ । सैनामैना–८ का वडा अध्यक्ष बुद्धिराम चौधरीको नेतृत्वमा प्रहरी टोली र स्थानीयहरु संयुक्तरूपमा उद्धारमा जुटेका थिए ।