कान्ति माविमा अन्तर सदनात्मक हाजिरीजवाफ प्रतियोगिता 

बुटवल । बुटवल ४ स्थित कान्ति माविले विद्यार्थीहरुमा भएको अन्तरनिहित प्रतिभालाई प्रष्फुटन गराउने उद्देश्यले अन्तर सदनात्मक हाजिरीजवाफ प्रतियोगिता शुक्रवार सम्पन्न गरेको छ ।
कक्षा १ र २ को समूह, कक्षा ३ देखि ५ को समूह, कक्षा ६ र ७ को समूह र कक्षा ८, ९ र १० को समूह बनाई तहगत रुपमा प्रतियोगिता सञ्चालन गरेको अतिरिक्त कृयाकलाप प्रमुख महेश खनालले जानकारी गराउनु भयो ।
विद्यालयका प्रधानाध्यापक गोविन्द ज्ञवाली, साहायक प्रधानाध्यापक पूर्णभद्र उपाध्याय, केदारनाथ ज्ञवाली, तहगत संयोजक डिल्लीप्रसाद वेलवासे, विदूर पौडेल, घनश्याम यादव, राजन अर्याल, नारायण सुवेदी, लिलाधर पाण्डेको आतिथ्यतामा कार्यक्रम भएको हो ।
प्रावितहको कार्यक्रम संयोजन लिलाधर पाण्डे, कक्षा ६ र ७ को संयोजन सूर्य पौडेल र ८ ९ र १० को संयोजन मित्रलाल पोख्रेलले गर्नुभएको थियो । प्रतियोगितामा प्रावितहमा स्वस्तिका प्रधान, माधव पाण्डे र आर्यन अर्यालको समूह प्रथम, सोनाली शर्मा, आयूष गुप्ता र रोहन कानूको समूह दोस्रो र कविता कुंवर, अंश बलाल र कुशल जिसीको समूह तेस्रो भएका छन् ।
कक्षा ६ र ७ को समूहमा भैरवस्थान सदन प्रथम, रेसुङ्गा सदन दोस्रो र सुपादेउराली सदनले तेस्रो स्थान प्राप्त गरेका छन् । यस्तै कक्षा ८, ९ र १० को समूह अन्तर्गत सुपादेउराली सदन प्रथम, रेसुङ्गा सदन दोस्रो र स्वर्गद्वारी सदन तेस्रो भए ।
विद्यालयले विद्यार्थीहरुमा लुकेका प्रतिभा उजागर गर्न प्रत्येक शुक्रबार यस्ता कार्यक्रम आयोजना गर्दै आएको छ । विद्यालयमा हाल पाँचहजार सात सय विद्यार्थी अध्ययनरत रहेका विद्यालयले जनाएको छ ।