पुँजिगत खर्च गर्नेमा सियारी गाउँपालिका रुपन्देहीमै पहिलो, कम खर्च गर्ने मर्चवारी

बुटवल । रुपन्देहीको सियारी गाउँपालिका जिल्लामै सबैभन्दा धेरै पुँजीगत खर्च गर्ने पहिलो स्थानीय तह भएको छ ।
रुपन्देहीका १६ वटा पालिकामध्ये सियारी गाउँपालिकाले सबैभन्दा बढी पुँजिगत खर्च गरेको छ । आर्थिक बर्ष २०७९÷०८० मा सियारीले ८७ दशमलव १५ प्रतिशत खर्च गरेको कोष तथा लेखा नियन्त्रक कार्यालय रुपन्देहीले जनाएको छ ।
कार्यालयले दिएको जानकारी अनुसार रुपन्देहीका १६ वटा पालिकाहरुले समग्रमा ७७ प्रतिशत पुँजिगत खर्च गरेका छन् ।
सबै पालिकाका लागि ३१ करोड ७६ लाख ७३ हजार बजेट बिनियोजन भएकोमा २७ करोड ७२ लाख ८४ हजार अर्थात ८७.१५ प्रतिशत खर्च गर्न पालिकाहरु सफल भएको प्रमुख कोष नियन्त्रक बिष्णुप्रसाद ज्ञवालीले जानकारी दिनुभयो ।
कोष तथा लेखा नियन्त्रक कार्यालयका अनुसार जिल्लामा सबैभन्दा कम पुँजिगत खर्च गर्नेमा मर्चवारी गाउँपालिका रहेको छ । मर्चवारीले ६४ प्रतिशत मात्र खर्च गरेको छ । त्यसपछि पँुजिगत खर्च गर्न नसक्नेमा सुद्धोधन गाउँपालिका रहेको छ । सुद्धोधनले ६८ दशमलव ९७ प्रतिशत मात्र खर्च गरेको छ ।
पुँजीगत खर्च गर्नेमा सियारी पछि कोटहीमाई गाउँपालिका रहेको छ । कोटहीमाईले ८४ दशमलव ४१ प्रतिशत खर्च गरेको छ । त्यसपछि पुँजिगत खर्च गर्नेमा मायादेवी गाउँपालिका रहेको छ । मायादेवीले ८२ दशमलव २४ प्रतिशत खर्च गरेको छ ।
बुटवल उपमहानगरपालिकाले ६९ दशमलव ४८ प्रतिशत, तिलोत्तमा नगरपालिकाले ७३ दशमलव ३८ प्रतिशत, देवदह नगरपालिकाले ७३ दशमलव ८१ प्रतिशत, लुम्बिनी साँस्कृतिक नगरपालिकाले ७६ दशमलव ४० प्रतिशत र सिद्धार्थनगर नगरपालिकाले ७२ दशमलव ४९ प्रतिशत खर्च गरेका कोष तथा लेखा नियन्त्रक कार्यालयले जनाएको छ ।
त्यसैगरी सैनामैना नगरपालिकाले ७९ दशमलब ३४ प्रतिशत, ओमसतिया गाउँपालिकाले ७९ दशमलव २६ प्रतिशत, कञ्चन गाउँपालिकाले ८१ दशमलब १२ प्रतिशत खर्च गरेको छ ।
कार्यालयका अनुसार गैडहवा गाउँपालिकाले ८२ दशमलव २ प्रतिशत, रोहिणी गाउँपालिकाले ७९ दशमलब ६३ प्रतिशत र सम्मरीमाई गाउँपालिकाले ७८ दशमलब ५४ प्रतिशत खर्च गरेको छ ।