बुटवल । प्रधानमन्त्री पुष्पकमल दाहाल ‘प्रचण्ड’ विरुद्ध सामाजिक सञ्जालमा घृणा र द्वेष फैलाउने सामाग्री सम्प्रेषण गरेको आरोपमा बुटवलबाट एक युवा पक्राउ परेका छन् । प्रधानमन्त्री प्रचण्डकी पत्नी सीता दाहालको निधनसँग जोडेर सामाजिक सञ्जालमा प्रधानमन्त्री विरुद्ध घृणा र द्वेष फैलाउन सामाग्री सम्प्रेषण गरेको आरोपमा नेपाल प्रहरी साइबर ब्युरोले रुपन्देही देवदह नगरपालिका–८ वस्नै वर्ष ४९ का शेरबहादुर रानालाई बुटवलको देबीनगरबाट पक्राउ गरेको हो ।
ब्युरोको टोलीले काठमाडौंबाट लोकेशनको खोजी गर्दै बुटवल आएर इलाका प्रहरी कार्यालय बुटवलको सहयोगमा रानालाई पक्राउ गरेर काठमाण्डौ लगेको प्रहरी स्रोतले जनाएको छ । मगरले ‘टाईगर राना मगर’ नाम भएको फेसवुक प्रोफाइलवाट प्रधानमन्त्रीको तस्बिर प्रयोग गरी कानुनले प्रतिवन्ध लगाएका भ्रामक, आपत्तिजनक शब्दहरु प्रयोग गरी सामाजिक सञ्जालमा सम्प्रेषण गरेको आरोप प्रहरीले लगाएको छ ।
‘अरूलाई विधवा बनाएर अब आफ्नो पनि त्यस्तै हो’ भन्ने खालको कुरा जोडेर लेखेको अभियोगमा छाबिन गर्दा रानाले सो स्टाटस पोष्ट गरेको देखिएपछि पक्राउ गरिएको स्रोतको दाबी छ । त्यस्तै मगरमाथि प्रधानमन्त्री प्रचण्डको तस्बिर जोडेर भारतीय आधार कार्ड, आयकर कार्ड लगायत नक्कली विवरणसहितको तस्बिर सामाजिक सञ्जालमा राखेको आरोप पनि प्रहरीले लगाएको छ ।
पक्राउ परेका रानामाथि प्रहरीले पाँच दिनको म्याद लिएर हिरासतमा राखी थप अनुसन्धान गरिरहेको छ ।
