बुटवल । चन्द्रमासअनुसार पहिलो साउने सोमबारको व्रत आजदेखि सुरु भएको छ । सौरमासअनुसार यस वर्ष साउन महिनामा अधिकमास परेको छ । चन्द्रमासअनुसार दुईवटा सोमबारपछि अधिकमास सुरु हुने नेपाल पञ्चाङ्ग निर्णायक समितिले स्वीकृति दिएको पात्रोमा उल्लेख गरिएको छ ।
समितिका सदस्य एवं धर्मशास्त्रविद् प्रा.डा. देवमणि भट्टराईले गुरु पूर्णिमादेखि जनैपूर्णिमासम्मका सोमवार व्रत लिनुपर्ने कुरा निर्णय सिन्धुलगायत ग्रन्थमा उल्लेख गरिएको बताउनुभयो । धर्मशास्त्रका विज्ञ बीच यस वर्षको अधिकमासको साउनमा परेको सोमवार व्रत गर्ने कि नगर्ने भन्नेमा मतान्तर देखिएको छ । नेपालमा सौरमास अनुसारका सोमवार नै व्रत गर्ने परम्परा रहेको समितिका पूर्व अध्यक्ष समेत रहेका धर्मशास्त्रविद् प्रा.डा. रामचन्द्र गौतम बताउनुहुन्छ ।
यसपटक साउन महिनामा जम्मा ८ सोमबार व्रत बस्ने भएको छ । यो साउन महिना ३१ अगस्टसम्म रहनेछ । यो वर्ष साउनमा अधिक (मलमास) परेको छ । गुरुपूर्णिमाको एक महिनामा आउने जनैपूर्णिमा यो वर्ष दुई महिनामा पर्नेछ । सोमबारको व्रत पनि लम्बिने देखिन्छ । शुद्ध श्रावण कृष्ण पक्षमा असार २५ र साउन १ गते तथा शुद्ध श्रावण शुक्ल पक्षमा भदौ ४ र ११ गते सोमबार परेको छ ।
साउन १, ८, १५, २२ र २९ गते सोमबार परेको छ । चन्द्रमानलाई आधार मानेर व्रत बस्नेले आजदेखि (असार २५) देखि भदौ ११ गतेसम्म आठ वटा सोमबारको ब्रत बस्नुपर्ने भएको छ । यसपटक साउन महिना ५८ दिनसम्म रहनेछ । यस्तो अवस्थामा ८ साउन सोमबार र ४ प्रदोष व्रत गरी साउन शिवरात्रि पर्व मनाइँदैछ । साउनको अन्तिम सोमबार व्रत र प्रदोषको दुर्लभ संयोग पनि हुनेछ ।
साउनमा शिवको पूजा गर्नु धेरै शुभ मानिन्छ किनभने भोलेनाथ साउनमा छिट्टै प्रसन्न हुन्छन् भन्ने मान्यता छ । त्यसैले यो महिना शिवको ब्रत तथा पूजा गर्नाले सबै प्रकारका मनोकामना पूरा हुने विश्वास गरिन्छ ।
