बुटवल । बुटवलका २ वटा सुन चाँदी पसल सिल गरिएको छ । रुपन्देहीको कालीदह नाका हुँदै भारत लैजाँदै गर्दा बरामद भएको करिव दुई केजी सुनको अनुसन्धानका क्रममा बुटवल अमरपथमा रहेको बालाजी सुनचाँदी पसल र लक्ष्मीपति सुनचाँदी पसलको समेत संलग्नता देखिएपछि दुबै पसलमा सिल गरिएको हो ।
यही असार १० गते लुम्बिनी साँस्कृतिक नगरपालिका–१३ कालिदह नाका हुँदै नेपालबाट भारततर्फ लैजाँदै गर्दा सशस्त्र प्रहरीले इँटाजस्तै रङ र आकारको करिव दुई किलोको शंकास्पद वस्तु बरामद गरेको थियो । अनुसन्धान गर्दा इँटाजस्तो उक्त वस्तु एक केजी ९६५.३ ग्राम तौलको सुन प्रमाणित भएको थियो । कालीदह नाका हुँदै भारततर्फ जान लागेको बा १२ च ३८२० नम्बरको मारुती सुजुकी कारलाई सशस्त्र प्रहरीको सीमा सुरक्षा गुल्मको टोलीले चेकजाँच गर्दा सो सुन बरामद गरिएको थियो ।
सुन बरामद गर्दा पक्राउ परेका व्यक्तिको बयानका आधारमा बुटवलको अमरपथमा रहेको बालाजी र लक्ष्मीपती सुनचाँदी पसलको पनि संलग्नता देखिएको प्रारम्भिक अनुसन्धानबाट खुलेको भैरहवा भन्सार कार्यालयले जनाएको छ ।
अहिले बालाजी र लक्ष्मीपती सुनचाँदी पसललाई सिल गरी अनुसन्धान भइरहेकाले विस्तृत विवरण भने खुलाउन नमिल्ने भैरहवा भन्सार कार्यालयका प्रवक्ता युवराज भट्टराईले बताउनुभयो ।
सुन सहित पक्राउ परेका दाङको घोराही उपमहानगरपालिका १० का हुमानन्द गिरीलाई अहिले जिल्ला अदालतबाट म्याद थप गरि अनुसन्धान सुरु गरिएको छ ।
