काठमाडौं । रुपन्देहीवाट पक्राउ परेका पूर्वमन्त्री टोपबहादुर रायमाझीका छोरा सन्दीपलाई प्रहरीले काठमाडौं लगेको छ । काठमाडौंका वरिष्ठ प्रहरी उपरीक्षक (एसएसपी) दानवहादुर कार्कीका अनुसार सन्दीपलाई आज विहान काठमाडौं लगिएको हो ।
एसएसपी कार्कीका अनुसार काठमाडौं ल्याईएका उनलाई जिल्ला अदालत, काठमाडौंमा पेश गरेर अनुसन्धानका लागि म्याद लिइनेछ । सन्दीप माथी नेपाली युवालाई नक्कली भुटानी शरणार्थी बनाएर अमेरिका लैजान ८७५ युवासंग रकम उठाउने गिरोहका सदस्य भएको आरोप छ ।
नेकपा एमालेका सचिव रहेका एवम् अर्घाखाँची क्षेत्र नम्बर १ बाट निर्वाचित सांसदसमेत रहेका टोपबहादुर रायमाझीका छोरा सन्दीपलाई बुधबार राति जिल्ला प्रहरी कार्यालय रुपन्देहीको हिरासतमा राखिएको थियो । जिल्ला अदालतले बुधबार टोपबहादुर र उनका छोरा सन्दीपविरुद्ध पक्राउ पुर्जी जारी गरेको थियो ।
नक्कली भुटानी शरणार्थी प्रकरणमा बुधबार पूर्वगृहसचिव सचिव टेकनारायण पाण्डे र मंगलबार तत्कालीन गृहमन्त्री रामबहादुर थापा बादलका सुरक्षा सल्लाहकार इन्द्रजित राई पक्राउ परेका थिए । गिरोहका नाइके भनिएकाहरू केशव दुलाल, सानु भण्डारी, सागर थुलुङ राई, टंक गुरुङ, अशोक पोखरेल र सन्देश शर्मा पोखरेल यस अघि नै पक्राउ परिसकेका छन् ।
पक्राउ परेकाहरुले दिएको बयानका आधारमा प्रहरीले तत्कालीन गृहमन्त्री बादलका छोरा प्रतीक र इन्द्रजित राईका छोरा निरजविरुद्ध पनि पक्राउ पुर्जी जारी गरेको छ ।