बुटवल । प्रतिनिधिसभाको उपनिर्वाचनअन्तर्गत तनहुँ क्षेत्र नम्बर १ मा राष्ट्रिय स्वतन्त्र पार्टी (रास्वपा)का डा. स्वर्णिम वाग्ले निर्वाचित भएका छन् । उनी निकटतम प्रतिस्पर्धी भन्दा १४ हजार ६९ मतान्तरसहित निर्वाचित भएका हुन् ।
वाग्ले ३४ हजार ९१९ मतसहित निर्वाचित भएका हुन् भने उनका निकटतम प्रतिस्पर्धी नेपाली कांग्रेसका उमेदवार गोविन्द भट्टराईले २० हजार १२२ मत प्राप्त गरेका छन् ।
तेस्रो स्थानमा रहेका नेकपा (एमाले)का सर्वेन्द्र खनालले आठ हजार ४८८ मत प्राप्त गरे । यो क्षेत्रमा ६५ हजार २९८ मत खसेको थियो ।
०७९ मंसिर ४ मा भएको निर्वाचनमा यो क्षेत्रमा नेपाली कांग्रेसको तर्फबाट रामचन्द्र पौडेल निर्वाचित भएका थिए । उनी फागुन २५ गते राष्ट्रपतिमा निर्वाचित भएपछि यो क्षेत्रमा उपनिर्वाचन भएको हो ।
उपनिर्वाचन जितेका वाग्ले अर्थविद् हुन् । उनी राष्ट्रिय योजना आयोगको पूर्वउपाध्यक्ष हुन् । उनी २०७४ साउन १९ गते आयोगको उपाध्यक्ष नियुक्त भएका थिए । उनी तत्कालीन प्रधानमन्त्री सुशील कोइरालाको सरकारका पालामा आयोगको सदस्य बनेका थिए ।
गएको चैत १६ गते नेपाली कांग्रेस परित्याग गरेका वाग्ले राष्ट्रिय स्वतन्त्र पार्टी प्रवेश गरी उमेदवार बनेका हुन् । त्यसअघि, उनी नेपाली कांग्रेसको महासमिति सदस्य समेत बनेका थिए ।
