बुटवल । दुध खरिद गरेर दुधको पैसा नतिरेको भन्दै बुटवलका दुई ब्यवसायिक संस्थाको प्राङ्गणमा दुग्ध सहकारीका किसानहरुले धर्ना दिएका छन् ।
रूपन्देहीको सैनामैना नगरपालिका साल्झण्डीस्थित सालझण्डी दूग्ध उत्पादक सहकारी संस्थाबाट दुध खरिद गरेर बुटवलको कस्तुरी मिष्ठान्न भण्डार र पाठक दुध डेरीले सहकारीको पैसा नतिरेको भन्दै यी दुई संस्थाको ब्यवसायिक भवन अगाडी किसानहरुले धर्ना दिएका हुन् ।
दुध खरिद गरेको रकम तिर्न पटक पटक ताकेता गर्दा पनि नतिरेपछि किसानहरु आएर दुबै पसलमा धर्ना दिएका हुन् ।
सालझण्डी दूग्ध उत्पादक सहकारी संस्थालाई दुध बेचेका किसानहरु पैसा असुलीका लागि सहकारीकै अगुवाइमा धर्ना दिन आएका हुन् । लामो समय सम्म दूधको पैसा नदिएपछि सहकारीले किसानलाई आन्दोलनमा उतारेको हो ।
सहकारी संस्थाका अध्यक्ष तिलकराम घिमिरेका अनुसार कस्तूरी मिष्ठान्न भन्डारले १३ लाख ७० हजार ४ सय र पाठक दुध डेरीले सहकारीलाई ११ लाख ६० हजार तिर्न बांकी छ । पटक पटक चेक दिने तर पैसा नभएको चेक दिएर किसानलाई झुक्काउंदै आएकाले अनिश्चितकालीन धर्नामा बस्नु परेको सहकारीका अध्यक्ष घिमिरेले बताए ।
धर्ना बस्न आएका एक किसानका अनुसार पाठक डेरीले जिल्ला डेरि उद्योग संघको रोहबरमा एक हप्तामा साटिने भाका राखेर १० लाखको चेक दिएको छ भने बाँकी पैसा भोली नगदै दिने सहमति गरेको छ । तर कस्तुरी मिस्ठान भण्डारले भने अझै पैसा दिने संकेत गरेको छैन उनले भने ।
