बुटवल । लुम्बिनी प्रदेशका सांसद दिनेश पन्थीले मुलुकमा राजनीतिक र आर्थिक स्थिरताका लागि प्रमुख दलहरुबीच सहकार्य जरुरी रहेको औल्याउनु भएको छ । मुलुकमा भएका परिवर्तन र परिवर्तनलाई संस्थागत र स्थापित गर्न नेपाली कांग्रेस, एमालेलगायत मुख्य दलहरुबीच सहकार्य भएको स्मरण गर्दै आज पनि प्रमुख राजनीतिक दलको सहकार्य आवश्यक रहेको सांसद पन्थीले बताउनु भयो ।
दलहरुबिचको खिचातानीले प्राप्त उपलब्धीहरु खतरामा पर्न लागेको र यसको मौका छोपेर एजेण्डा बिहिन शक्तिहरु र परिवर्तन नचाहने शक्तिले टाउको उठाउन थालेकाले जनस्तरबाट पनि दबाब सिर्जना गर्नुपर्नेमा उहाँले जोड दिनु भयो ।
गुल्मी सिर्सेनी सम्पर्क समाज रुपन्देहीले आज बुटवलमा गरेको भित्तेपात्रो बिमोचन तथा नयाँ बर्षकोे शुभकामना आदान प्रदान कार्यक्रममा सांसद पन्थीले अब राजनीतिक दलहरुले शासकीय ब्यवस्था र संघीयता प्रति जनताको जुन दृष्टिकोण छ यसलाइ समयमै सम्बोधन गर्न नसके बर्तमान ब्यवस्था नै खतरामा पर्ने जिकिर गर्नु भयो ।
