बुटवल । होटल तथा रेष्टुरेण्ट व्यवसायी संघ रुपन्देहीमा नयाँ नेतृत्वका लागि चुनावी सरगर्मी शुरु भएको छ । संघको नेतृत्वका लागि संघका वरिष्ठ उपाध्यक्ष बाबुराम गौतम र प्रथम उपाध्यक्ष लेखनाथ भण्डारीले अलग अलग प्यानल बनाएर चुनावी मैदानमा होमिएका छन् । सोमवार भएको उम्मेदवारी दर्तामा संघको कोषाध्यक्ष वाहेकका पदमा दोहोरो उम्मेदवारी परेको छ ।
यही चैत २४ र २५ गते संघको २२ औ साधारण सभा तथा ११ औ अधिबेशन हुने भएको छ । नयाँ नेतृत्वका लागि सोमवार भएको उम्मेदवारी दर्ताको निर्वाचन कार्यतालिका अनुसार कोषाध्यक्षमा रामबहादुर न्यौपानेको एकल उम्मेदवारी परेको छ भने अन्य सबै पदमा दोहोरो उम्मेदवारी परेको छ ।
संघको नेतृत्वका लागि संघका वरिष्ठ उपाध्यक्ष बाबुराम गौतम र प्रथम उपाध्यक्ष लेखनाथ भण्डारीले अलग अलग प्यानल बनाएर चुनावी मैदानमा होमिएका छन् । ं
दुवै प्यानलका अध्यक्षका उम्मेदवारले आफ्नो जित सुनिश्चित भएको दावि गरेका छन् । मुलुकमा देखा परेको आर्थिक मन्दीले होटल व्यवसाय पनि थला परेको बेला हुन थालेको संघको अधिबेशनमा दुवै प्यानलका अध्यक्षका उम्मेदवारले व्यवसायीहरुले भोग्नु परेका समस्यामा केन्द्रितहुने प्रतिवद्धता जनाएका छन् ।
अध्यक्षका प्रत्यासी बाबुराम गौतमले यस क्षेत्रका व्यवसायीका समस्या समाधान र चर्को घर भाडा दोहोरो कर र यस क्षेत्रका पर्यटन व्यवसायीलाई टेवा पुराउने गरि बुटवलमा पर्यटन कार्यालय स्थापना लगाएतमा आफ्नो प्यानलको ध्यान रहने औल्याउनु भयो ।
त्यस्तै अध्यक्षका अर्का प्रत्यासी लेखनाथ भण्डारीले लुम्बिनी प्रदेशको राजधानी बुटवलवाट दाङ सरेसंगै यहाँका व्यवसायीले खेप्नु परेका तमाम समस्याको समाधानमा पहलकदमी रहने औल्याउनु भयो । भण्डारीले कोभिडले थला परेको ब्यवसाय र व्यवसायीलाई संरक्षण गदै रुपन्देहीमा व्यवसायी कएकतामा ध्यानदिने प्रतिवद्धता जनाउनु भयो ।
संघको वरिष्ठ उपाध्यक्षमा माधवकुमार खनाल र टंकप्रसाद पोखरेल, पर्यटन उपाध्यक्षमा चुत्रबहादुर पौडेल(टेकु) र रोमाकान्त पाण्डे, प्रथम उपाध्यक्ष्यमा केशवराज कंडेल र टंकप्रसाद पराजुली (प्रकाश), द्धितीय उपाध्यक्षमा प्रेमप्रसाद भट्टराई र खुमराज ज्ञवाली, महासचिवमा अर्जुन थापा र मोहनलाल पाण्डे तथा कोषाध्यक्षमा रामबहादुर न्यौपानेको उम्मेदवारी दर्ता भएको छ । यस्तै सचिवमा थम्मनबहादुर भण्डारी र डिल्लीराज अर्याल, सह सचिवमा अर्जुन पोख्रेल र मोहन बस्याल तथा सहकोषाध्यक्षमा कृष्णप्रसाद पाण्डे र माधव ढकाल मैदानमा उत्रिनु भएको छ ।
संघको १० पदाधिकारी र ११ सदस्य सहित २१ पदका लागि ४१ जनाको उम्मेदवारी परेको प्रमुख निर्वाचन अधिकृत कृष्णप्रसाद वस्यालले जानकारी दिनुभयो । होटल तथा रेष्टुरेण्ट व्यवसायी संघ रुपन्देहीमा १ हजार २ सय ३ जना ब्यवसायी आवद्ध छन् ।
