केन्द्रीय राजनीतिको प्रभाव लुम्बिनीमा, संकटमा गिरी सरकार

कांग्रेसका चौधरीलाई मुख्यमन्त्री बनाउन ५३ सांसदले बुझाए प्रदेश प्रमुखलाई हस्ताक्षर

बुटवल । केन्द्रीय राजनीतिमा आएको फेरबदल संगै त्यसको प्रभाव लुम्बिनी प्रदेशमा पनि देखिएको छ ।
नेकपा माओवादी केन्द, जनमत पार्टी, जसपा, लोसपा र राप्रपा सहितका दलहरुको समर्थनमा लुम्बिनी प्रदेशको मुख्यमन्त्री बनेका एमाले संसदीय दलका नेता लिला गिरी दुई महिनामै अल्पमतमा पर्नुभएको छ् । गत पुस २७ गते मुख्यमन्त्रीमा नियुक्त हुनुभएका गिरीले माघ ५ गते विश्वासको मत लिनु भएको थियो ।
गिरी सरकारलाई समर्थन गरेका र सरकारमा सहभागि भएका दलहरुले आईतवार मुख्यमन्त्री गिरीको राजीनामा माग गर्दै नेपाली कांग्रेस संसदीय दलका नेता डिल्ली चौधरीलाई मुख्यमन्त्री बनाउन प्रदेशसभाका ५३ सांसदले हस्ताक्षर गरी प्रदेश प्रमुख अमिक शेरचनलाई लाई बुझाएका छन् ।
आइतबार प्रदेश प्रमुख शेरचन समक्ष आठ दल र एक स्वतन्त्र सांसदको हस्ताक्षर बुझाइएको हो । कांगे्रसका २७, नेकपा माओवादी केन्द्रका १०, जनमत पार्टी, जसपा र लोसपाका तीन–तीनसँगै नागरिक उन्मुक्तिका चार तथा नेकपा एकीकृत समाजवादी, राष्ट्रिय जनमोर्चा र स्वतन्त्र सांसद एक–एकजना गरी ५३ जनाले प्रदेश प्रमुखलाई हस्ताक्षर बुझाएका हुन् । लुम्बिनी प्रदेशसभामा जम्मा ८७ जना सांसदहरु छन् ।
प्रदेश प्रमुख शेरचन समक्ष बुझाइएको प्रदेशसभाका बहुमत सांसदहरुले नयाँ मुख्यमन्त्री नियुक्तिको मागगर्दै संविधानको धारा १६८, २ अनुसार सरकार गठनका लागि माग समेत गरेका छन् ।
यसअघि पनि लुम्बिनी प्रदेशको दोस्रो मुख्यमन्त्री चयन हुँदा यसै धारा अन्तर्गत सरकार गठन गरिएको थियो ।
संसदहरुले बुझाएको पत्र बुझ्दै प्रदेश प्रमुख अमिक शेरचनले पछिल्लो राजनीतिक घटनाक्रमले देशमा स्थिर सरकार चल्न नसकेको र विकास निर्माण र समृद्धि स्थापित गर्न नसकिएको बताउँदै बहुमत सांसदहरुको मागदाबीलाई आफूले बुझेको भएपनि वर्तमान मुख्यमन्त्रीले संविधान अनुसार १ देखि २ महिनासम्म लम्ब्याउन सक्ने संविधानमा स्पष्ट लेखिएको जनाउँदै त्यसपछिको विकल्प राजीनामा दिनुभन्दा अरु विकल्प नभएको बताउनु भयो । गिरी नेतृत्वको सरकारमा सहभागि नेकपा माओवादी केन्द्र, जनमत र जसपा सकारबाट बाहिरिएका छन् ।
आइतबार माओवादीका मन्त्रीहरूले मुख्यमन्त्री लिला गिरी नेतृत्वको सरकारबाट राजीनामा दिएका हुन् । माओवादी केन्द्रबाट लुम्बिनीमा जोखबहादुर महरा, इन्द्रजित चौधरी र कृष्णा केसी गरी ३ जना मन्त्री बनेका थिए । यस्तै जनमत पार्टीवाट मन्त्री वनेको पार्टी संसदीय दलका नेता सिके गुप्ताले पनि मुख्यमन्त्री समक्ष राजीनामा बुझाएका छन् ।
जनमत, जसपा र माओवादी केन्द्र बाट मन्त्री बनेकाहरुले राजीनामा दिएको ती पार्टीहरुले जनाएका छन् । माओवादी संगै सानादलहरु सरकारबाट बाहिरिएसँगै मुख्यमन्त्री गिरी अल्पमतमा परेका छन् । लुम्बिनीमा एमाले र राप्रपा बाहेक अन्य सबै दल एकातर्फ लागेका छन् ।