भैरहवा । रुपन्देही क्रिकेट संघको आयोजनामा भैरहवामा जारी नेपाल टेलिकम रुपन्देही सुपरलिग क्रिकेट प्रक्रियोगिता अन्तर्गत डिभिजन ‘ए’को शनिबारको खेलमा लुम्बिनी खुकुरी क्रिकेट क्लब विजयी भएको छ । लुम्बिनी खुकुरीले सैनामैना क्रिकेट क्लबलाई ७ विकेटले पराजित गर्दै जित निकालेको हो ।
सिद्धार्थ रंगशालामा भएको खेलमा टस जितेर ब्याटिङ गरेको सैनामैनाले निर्धारित ५० ओभरको खेलमा सबै विकेटको नोक्सानीमा जम्मा ८० रनको झिनो योगफल बनायो । लुम्बिनी खुकुरीका बलर चम्किँदा सैनामैनाका ब्याट्सम्यान निरीह बने । सैनामैनाका लागि विशन डुम्रे र सन्जु बोहराले समान १५–१५, विक्रम गौतमले १३ र बसन्त खड्काले १२ रन बनाए पनि अन्य ब्याट्सम्यानले दोहोरो रन समेत जोड्न सकेनन् ।
८.५ ओभर बलिङ गरेका लुम्बिनी खुकुरीका इकलाख अहमद वारिसले ५ मेर्डन राख्दै १३ रन खर्चेर ५ विकेट लिए । यस्तै, अजयकुमार चौहानले ३ तथा साहब आलम र सन्तोष यादवले १–१ विकेट लिए ।
प्रतिउत्तरमा लुम्बिनी खुकुरीले १५.३ ओभरमा ३ विकेटको नोक्सानीमा ८४ रन बनाउँदै जित निकाल्यो । उसको जितमा विराट भण्डारी र निश्चल चौधरीले नटआउट क्रमशः २७ र १८ रन जोडे । बलिङमा सैनामैनाका करण विकले ३ विकेट लिए । लुम्बिनी खुकुरीका इकलाख अहमद वारिस म्यान अफ द म्याच भई एक हजार रुपैयाँबाट पुरस्कृत भएको आयोजक संस्था रुपन्देही क्रिकेट संघका उपाध्यक्ष एवं प्रतियोगिता संयोजक धिरज अधिकारीले जनाए ।
चैत्र ३ गतेसम्म चल्ने प्रतियोगितामा बिजेताले १ लाख रुपैयाँ र ट्रफी तथा उपबिजेताले ५० हजार र ट्रफी प्राप्त गर्नेछन् । प्रतियोगितामा म्यान अफ द सिरिजले १५ हजार रुपैयाँ, बेस्ट ब्याट्सम्यान, बेस्ट बलर र उदयीमान खेलाडीले जनही ५ हजार रुपैयाँ तथा प्रत्येक खेलेको म्यान अफ द म्याचले १ हजार रुपैयाँ प्राप्त गर्ने छन् ।
प्रतियोगिताको प्रमुख प्रायोजकमा नेपाल टेलिकम तथा संरक्षकमा सिद्धार्थनगर नगरपालिका छन् । प्रतियोगिता बिजेता पुरस्कार एभरेस्ट कत्था मिल तथा उपबिजेता पुरस्कार रुपन्देही क्रिकेट संघका संस्थापक अध्यक्ष एवं विके ज्वेलर्सका प्रबन्ध निर्देशक प्रेमकुमार सेन्चुरीले सौजन्य गरेका छन् ।
