राजमोद्वारा देशभर संघीयताको बिरोधमा सभा

बुटवल । संघीयताको विपक्षमा रहेको राष्ट्रिय जनमोर्चाले संघीयता विरुद्व देशभर बिरोध सभा गरेको छ । राष्ट्रियता र गणतन्त्रको रक्षा र संघीयता खारेजीका लागि पार्टीले देशभर आयोजना गरेको कार्यक्रम अनुसार राष्ट्रिय जनमोर्चा रुपन्देहीले शनिबार बुटवलमा सभाको आयोजना गरेको हो ।
सोही सभामा बोल्दै राष्ट्रिय जनमोर्चाका नेता बासुदेव पोखरेलले नेपालको राजनीतिमा अमेरिकी हस्तक्षेप बढेको बताउनुभयो । नेपालको संसदबाट एमसीसी पास भएसंगै नेपालको राजनीतिमा अमेरिकाको हस्तक्षेप बढेको उहांको दावी छ ।
चीनका विरुद्व लड्न नेपालको भूमि प्रयोगका लागि अमेरिकाले विकासको नाममा एमसीसी संसदबाट पास गराएको उल्लेख गर्दै अब अमेरिकाले एसपीपी परियोजना पास गराउने दाउमा रहेको उनले बताए ।
भारतका विरुद्व लड्न अमेरिकाले नेपालमा आफु अनुकुलको सत्ता चलाउन खोजेकोे दावी गर्दै नेता पोखरेलले भने – ‘भारत र अमेरिकाको हस्तक्षेपबाट नेपाललाई जोगाउन आमराष्ट्रवादी नेपाली सचेत हुनुपर्छ ।’
लुम्बिनी प्रदेश सांसद तारा थापाले मुलुकको राष्ट्रियता प्रति सत्तासिन दलहरु गम्भीर नदेखिएको बताउदै उनले आफुलाई ठुला भन्ने एमाले, माओवादी, कांगे्रस, राजावादी र जातीबादीहरुबाट गणतन्त्र खतरामा रहेको दावी गरिन् ।
कार्यक्रममा राष्ट्रिय जनमोर्चाका रुपन्देही अध्यक्ष बद्रे आलमले मुलुकको राष्ट्रियता र स्वाभिमान बचाउन आमनेपाली नागरिक सचेत हुनुको अर्को कुनै विकल्प नभएको बताए ।
इन्दिरा ज्ञवालीको अध्यक्षता र टानबहादुर केसीको सञ्चालनमा कार्यक्रम भएको थियो ।