सालझण्डी । सुस्त मनस्थिति भएकी महिलालाई घरमा कोही नभएको मौकापारी जवरजस्ती करणी गर्न खोज्ने एकजना व्यक्ति रुपन्देहीको कञ्चन गाउँपालिकाबाट पक्राउ परेका छन् । यहि पौष २१ गते साँझको समयमा शारिरीक रुपमा अपांगता भएकी र सुस्त मनस्थिति भएकी २३ वर्षीया महिलाको घरमा गई अरु कोही नभएको मौका छोपी जवरजस्ती शौचालयमा लगी पीडित महिलाको शारिरीक र सुस्त मनस्थितिको फाईदा उठाउँदै पीडित महिलालाई जवरजस्ती करणी उद्योग गर्न खोज्ने रुपन्देही जिल्लाको कञ्चन गाउँपालिका वडा नं ३ का ३० वर्षिया राजेन्द्र अधिकारीलाई कञ्चन गाउँपालिका वडा नं ४ बाट प्रहरीले नियन्त्रणमा लिएको हो । प्रहरीले निज माथि जवरजस्ती करणी कसुर अन्तरगत अनुसन्धान गरिरहेको जनाएको छ ।
त्यस्तै रुपन्देहीको सैनामैना नगरपालिकाको वडा नं ६ मा १५ वर्षिया बालिकालाई अभिभावक नभएको मौका पारी साँझको समयमा आगो ताप्ने वाहनामा घरमा आई जवरजस्ती करणी गर्ने मनसायले बालिकाको संवेदनशील अंगहरुमा छुने चलाउने तथा जवरजस्ती करणी गर्न खोज्ने २५ वर्षिया मधु सोमरेलाई सैनामैना नगरपालिकाको सुखौराबाट प्रहरीले पक्राउ गरेको छ । निज माथि जवरजस्ती करणी उद्योग कसुरमा अनुसन्धान भैरहेको छ ।
बालिकाको आमा बिदेशमा भएको र घरमा बुबा पनि काममा गएको मौका पारी आफूलाई जवरजस्ती करणी गर्न खोजेको कुरा छिमेकी महिलालाई बताएपछि तत्काल प्रहरीलाई खबर भएकोमा सोमरेलाई सोहि समयमै पौष २१ गते पक्राउ गरिएको प्रहरीले जनाएको छ ।
पक्राउ परेका दुवैजनालाई ईलाका प्रहरी कार्यालय सालझन्डीमा राखी जवरजस्ती करणी उद्योग कसुर अन्तरगत म्याद थप भई आवश्यक अनुसन्धान भैरहेको छ । जिल्ला प्रहरी कार्यालय रुपन्देहीका प्रवक्ता प्रहरी नायव उपरीक्षक श्यामु अर्यालले जानकारी गराउनु भयो ।
