बुटवल । संसार बचत तथा ऋण सहकारी संस्था लि. बुटवल–११, को दशौ वार्षिक साधारण सभा शनिबार सम्पन्न भएको छ ।
कार्यक्रममा बोल्दै बुटवल उपमहानगरपालिकाका सहकारी विभाग प्रमुख गुणाखर खनालले सहकारीहरुले स्थानीय जनसमुदायको आर्थिक स्थिति सुधारमा निकै महत्वपुर्ण कार्य गरिरहेको बताउनुभयो । सहकारीले स्थानीय सबै जनसमुदायलाई समेटेर उनीहरुको आर्थिक उपार्जनका लागि लगानी गर्नुपर्ने पनि उहांले सुझाउनु भयो ।
कार्यक्रममा अध्यक्षको प्रतिवेदन प्रस्तुत गर्दै संस्थाका अध्यक्ष प्रकाश भट्टराईले सदस्यहरुको आर्थिक, सामाजिक र साँस्कृतिक जीवनस्तर उकास्नका लागि व्यवसायिक रणनीति योजना निर्माण गरी अगाडी बढ्ने प्रतिवद्धता जनाउनुभयो । साथै युवा तथा साना व्यवसायी स्वरोजगार कोष तथा अन्य बित्तिय संस्थाहरुसंग सहकार्य गरी सदस्यहरुलाई सहुलियत ऋणको व्यवस्था गरिने पनि उहांले बताउनुभयो । कार्यक्रममा बचत तथा ऋण सहकारी संघका सञ्चालक तथा संस्थाका निवर्तमान अध्यक्ष बिष्णुप्रसाद वस्ती, राष्ट्रिय सहकारी बैंक बुटवलका शाखा प्रमुख नारायण बेल्वासे र एम्स कलेज बुटवलका प्रमुख दीपक ढकाल, सहज बचत तथा ऋण सहकारी संस्थाका उपाध्यक्ष बिशाल बेल्वासे लगायतले आआफ्ना धारणा राख्नुभएको थियो ।
कार्यक्रममा उत्कृष्ट शेयर सदस्य बृद्धिमा प्रेम प्रसाद पाण्डे, उत्कृष्ट ऋणीमा लोक बहादुर थापा र उत्कष्ट बचतकर्तामा शेखर नेपाललाई सम्मान गरिएको थियो । त्यस्तै उत्कृष्ट कर्मचारी सम्मानबाट पुर्व व्यवस्थापक सुमन पाण्डे, पुर्व कर्मचारी उषा पन्थीलाई सम्मान गरिएको थियो । कार्यक्रम संस्थाका अध्यक्ष पकाश भट्टराईको अध्यक्षता, उपाध्यक्ष पदम प्रसाद न्यौपानेको स्वागत र सचिव राजेश खत्रीको संचालनमा भएको थियो ।
डिभिजन सहकारी कार्यलय रुपन्देहीमा २०६९ सालमा विधिवत दर्ता भई बुटवल–११ देवीनगरबाट सेवा प्रदान गर्दै आएको यस सहकारीले एक दशकको अवधिमा १०३४ शेयर सदस्यहरुलाई आवद्ध गराई सेवा प्रदान गर्दै आइरहेको छ । साथै हाल तिलोत्तमा स्थित मणिग्राम सेवा केन्द्रबाट पनि सेवा प्रदान गर्दै आइरहेको छ ।
