रुपन्देही । रुपन्देही प्रहरीले भ्रष्टाचार मुद्धामा कैद र जरिवाना ठहर भई १३ बर्षदेखि फरार ब्यक्तिलाई पक्राउ गरेको छ । अख्तियार दुरुपयोग अनुसन्धान आयोगका तत्कालिन अनुसन्धान अधिकृत बद्रि श्रेष्ठको जाहेरीले रेडियो नेपाल प्रशारण सेवा विकाश समिति क्षेत्रिय प्रसारण केन्द्र पोखराका तत्कालिन लेखापाल जिल्ला बाग्लुङ कुश्मीसेरा–९ घर भई रुपन्देही साविक रुद्रपुर–८ हालको कञ्चन गाँउपालिका वडा नं ३ बस्ने वर्ष ५१ को शेर बहादुर के.सीलाई खोजतलास गर्दै जाने क्रममा सालझण्डी प्रहरीले रुद्रपुरबाट फैसलाको १३ वर्षपछि पक्राउ गरेको हो ।
बिशेष अदालतको २०६६ सालको फैसला अनुसार पक्राउ परेका के.सीले लेखापालको रुपमा वहाल रहँदा रेडियो प्रशारण विभागमा कार्यरत कर्मचारीहरुको तलब समेत आफूले निकाली अपचलन गरेको हुनाले उनलाई भ्रष्टाचार गरेको ठहर गर्दै १ वर्ष ६ महिना कैद र ५ लाख ८० हजार ८८१ रुपैया छयासी पैसा बिगो र बिगो बमोजिम जरिवाना सजाँय तोकिको थियो । फैसला पछि विगत १३ वर्षदेखि फरार रहेका के.सी लाई ईलाका प्रहरी कार्यालय सालझण्डीका प्रहरी निरीक्षक जगन्नाथ मरासिनीको कमाण्डमा खटिएको प्रहरी टोलीले पक्राउ गरेको हो ।
पक्राउ परेका केसीलाई फैसला कार्यान्वयनको लागि जिल्ला अदालत रुपन्देहीमा उपस्थित गराईएकोमा कैद भुक्तानका लागि अदालतको आदेशअनुसार कारागार चलान भएको जिल्ला प्रहरी कार्यालयका प्रवक्ता डिएसपी श्यामु अर्यालले बताए ।
