तिलोत्तमा । रुपन्देहीको तिलोत्तममा यही मंसिर १५ देखि २६ गतेसम्म दोस्रो राष्ट्रि«य औद्योगिक ब्यापार मेला, कृषि तथा पर्यटन महोत्सव २०७९ हुने भएको छ । कोभिड १९ को कारण उपयुक्त वातावरणमा मेला संचालन गर्न नपाएका उद्योगी ब्यवसायीले यसपटक मंसिर १५ बाटै मेला शुरु गर्ने भएका हुन् ।
तिलोत्तमा उद्योग ब्यपार संगठनको आयोजना तथा तिलोत्तमा चेम्बर अफ कमर्स, तिलोत्तमा उद्योग बाणिज्य संघको सहआयोजनामा मेला हुन लागेको मेला मुल आयोजक समितिका संयोजक एवं तिलोत्तमा उद्योग ब्यापार संगठनका अध्यक्ष प्रेम जिएमले जानकारी दिए ।
अध्यक्ष जिएमका अनुसार मेला विभिन्न प्रकृतिका २ सयदेखि ३ सयसम्म स्टलहरु रहने छन् । आयोजकका अनुसार मेलाको करिब १५ लाख दर्शक उपभोक्ताले अवलोकन गर्ने अपेक्षा लिइएको छ । मेलामा महिला कुस्ती प्रतियोगिता, मम्मी डान्स, डान्स आइडल तथा विभिन्न विधाका प्रतियोगिताहरु संचालन गरिने छ ।
मेलामा आकर्षक सेल्फी जोनको पनि निमार्ण गरिने र आकर्षक प्यागोडा शैलीको गेट समेत निर्माण गरिने अध्यक्ष जिएमले बताए । मेलाले औद्योगिक बिकासमा टेवा पुर्याउने विश्वास गरिएको छ ।
मेला अवधिभर स्थानीय तथा राष्ट्रिय कलाकारहरुको सांगितिक प्रस्तुति रहने सांस्कृतिक संयोजक भूपति न्यौपानेले बताए । मेलामा विद्यालय स्तरका नृत्य प्रतियोगिता समेत राखिएको नृत्य प्रशिक्षक तिर्सना बुढाथोकीले जानकारी दिइन् ।
कोभिड १९ पछि खुलेर मेला संचालन नभएको अवस्थामा यो मेला सबैका लागि आकर्षक हुने तिलोत्तमा चेम्बर अफ कमर्शका संस्थापक जेपि कडेंलले बताए । आम उपभोक्ता र ब्यापारी ब्यवसायीलाई नजिक बनाउन यो मेलाले सहज भूमिका खेल्ने विश्वास उनले ब्यक्त गरे । मेलामा कृषि र पर्यटनलाई पनि टेवा पुग्ने गरी स्टलहरु सहभागि गराईने तिलोत्तमा चेम्बर अफ कमर्शका अध्यक्ष बाबुलाल भूसालले बताए ।
मेला अविधिभर संचारकर्मी, कुटनीतिक निकायका प्रतिनिधि तथा सरकारी निकायका कर्मचारीलाई निःशुल्क प्रवेशको ब्यवस्था मिलाइएको प्रचारप्रसार संयोजक सूर्य चापागाईले जानकारी दिए ।
