रुपन्देहीको सुद्धोधन गाउँपालिकामा मदिरासहितको पिकअप स्थानीयको नियन्त्रणमा

शुद्धोधन । रुपन्देहीको सुद्धोधन गाउँपालिकाका स्थानीयले एक गाडीसहित मदिरा नियन्त्रणमा लिएका छन् । शुक्रबार दिउसो रुपन्देही क्षेत्र नम्बर ३ अन्तरगत पर्ने सुद्धोधन–१ बलेवामा स्थानीयले मदिरासहितको गाडी नियन्त्रणमा लिएको ईलाका प्रहरी कार्यालय रन्यौरा (मुर्गिया) का प्रमुख जिवन लामिछानेले जानकारी दिए ।
स्थानीयले मदिरासहितको गाडी नियन्त्रणमा लिएपछि आफूहरुलाई खबर गरे पनि सम्पूर्ण अनुसन्धान गरेर मात्रै त्यहाँबाट गाडी लैजान पाउने भन्दै स्थानीयले घेरा हालेपछि आवश्यक प्रक्रिया पुर्याउने भनेर गाडीलाई घटनास्थलमै छाडिएको लामिछानेले बताए । सुद्धोधन–१ का वडा सदस्य मुरलीधर लोनियाले आफैले गाडी चलाएको र स्थानीयले नियन्त्रणमा लिएपछि गाडी छाडेर भागेको प्रत्यक्षदर्शीको दाबी छ ।
प्रहरीले सम्बन्धित दोषीलाई छाडेर गाडीलाई मात्र नियन्त्रणमा लिने देखिएपछि सबै अनुसन्धान गर्नु पर्ने माग गर्दै स्थानीयले गाडी रोकेको प्रत्यक्षदर्शी विजय थापाको भनाइ छ । स्थानीयका अनुसार गाडीको नम्बर भने अगाडी पछाडी नै स्पष्ट थिएन ।