बुटवल, ९ कात्तिक । रेडियो जागरणका समाचार प्रमुख एवम बुटवलका निश्कलंक र स्वच्छ छविका पत्रकार टेक मास्की रानाको उपचारको क्रममा मृत्यु भएको छ ।
दुई हप्ता अघि डेंगु संक्रमण भई लुम्बिनी प्रादेशिक अस्पतालको आईसीयूमा उपचाररत रानाको आज बिहान मृत्यु भएको पत्रकार महासंघ रुपन्देहीका अध्यक्ष रामराज पोखरेलले जानकारी दिनु भयो । रानालाई डेंगुसंगै मिर्गौला र जण्डिसको पनि समस्या देखिएको थियो ।
राना नेपाल पत्रकार महासंघ रूपन्देहीका पूर्व कार्यसमिति सदस्य, पत्रकार महासंघ लुम्बिनी प्रदेश कमिटि सदस्य, आदिवासी जनजाति पत्रकार महासंघ फोनिज रुपन्देहीको उपाध्यक्ष र सचिव समेत रहेर काम गर्नुभएको थियो ।
वि सं. २०३१ साल साउन १५ गते स्याङजाको कालीगण्डकी गाउँपालिका ३ बारीचौरमा जन्मिनुभएका रानाले २०५४ सालदेखि बुटवलबाट प्रकाशन हुने नयाँ दिशा दैनिकबाट पत्रकारिता शुरु गर्नुभएको थियो । २०६४ सालदेखि हालसम्म बुटवल स्थित रेडियो जागरणमा कार्यरत हुनुहुन्थ्यो । केहीवर्ष अघि श्रीमती गुमाएका रानाका बृद्ध आमा, दुई छोरी र एक छोरा छन् ।
घरको आर्थिक अवस्था कमजोर भएका रानाको मृत्युसंगै दुई छोरी र एक छोराको पालन पोषण र शिक्षादिक्षामा चुनौति थपिएको बताईएको छ ।
स्वर्गीय पत्रकार रानाको आजै उहांको जन्मस्थल स्याङ्गजामा नै अन्तिम दाह संस्कार गरिएको छ ।
पत्रकार मास्कीको निधन प्रति पत्रकार महासंघ रुपन्देही, नेपाल प्रेस युनियन र पेस सेण्टर नेपाल लगायतका पत्रकार सम्वद्ध संस्थाहरुले विज्ञप्ति जारी गरी दुख ब्यक्त गरेका छन् ।
