रुपन्देही – २ : सर्वोच्चद्वारा प्रतिनिधिसभा सदस्य उम्मेदवार राजु गुरुङको उम्मेदवारी खारेज

बुटवल, ४ कात्तिक । सर्वोच्च अदालतले रुपन्देही क्षेत्र नम्बर २ का प्रतिनिधिसभा सदस्य उम्मेदवार राजु गुरुङको उम्मेदवारी खारेज गरेको छ ।
न्यायाधीश ईश्वर खतिवडा र कुमार रेग्मीको संयुक्त इजलासले यसअघि सर्वोच्चकै एकल इजलासबाट भएको अल्पकालीन अन्तरिम आदेशलाई निरन्तरता दिइरहनु नपर्ने आदेश गरेको हो ।
यसअघि, गत आइतबार न्यायाधीश विश्वम्भर श्रेष्ठको एकल इजलासले रुपन्देही २ का निर्वाचन अधिकृतको उमेदवारी खारेज गर्ने निर्णय तत्काल कार्यन्वयन नगर्न आदेश गरेको थियो ।
रिटमा विपक्षी बनाइएका निर्वाचन आयोग, नेपाल राष्ट्र बैक, कर्जा सूचना केन्द्र लिमिटेड हेरिटेज प्लाजा, सिद्धार्थ बैंक लिमिटेड, रुपन्देही जिल्ला निर्वाचन अधिकृतको कार्यालय, प्रतिनिधिसभा निर्वाचन क्षेत्र नं. २ बुटवल÷मुख्य जिल्ला निर्वाचन अधिकृतको कार्यालय रुपन्देही भैरहवालाई अल्पकालीन अन्तरिम आदेश जारी गर्दै अन्तरिम आदेशमा छलफल गर्नका लागि उपस्थित हुने आदेश जारी गरिएको थियो । तर, शुक्रबारको संयुक्त इजलासले त्यसलाई निरन्तरता नदिने आदेश गरेको छ ।
“कानूनद्वारा तोकिएको कालोसूचीमा नाम समावेश रहेकोसम्बन्धी अयोग्यता निवेदक राजु गुरुङमा कायम रहेको देखिँदा निजले प्रतिनिधिसभा सदस्य पदको निर्वाचनमा उम्मेदवार हुन पाउने अवस्था देखिएन” सर्वोच्चको आदेशमा भनिएको छ ।
शुक्रबारको सुनुवाइमा गुरुङको तर्फबाट वरिष्ठ अधिवक्ताहरु हरीहर दहाल, शम्भु थापा, हरिप्रसाद उप्रेती, रमणकुमार श्रेष्ठ, डा. चन्द्रकान्त ज्ञवाली, दिनेश त्रिपाठी र शंकर सुवेदी तथा अधिवक्ताहरु अम्बरबहादुर राउत, नारायणप्रसाद पराजुली, रक्षा बस्याल र शुलभ खनाल बहसका लागि उपस्थित भएका थिए ।
गुरुङका तर्फबाट बहस गर्ने वकिलहरुले गुरुङविरुद्ध उमेदवारी खारेज गर्नका लागि ल्याइएको उजुरी निर्वाचन आयोगले तोकेको समय भित्र दर्ता नभएको तर्क गरेका थिए । त्यस्तै, चेक अनादरको मुद्दामा कारबाही भएर गुरुङलाई कालोसूचीमा राख्ने फैसलाविरुद्ध उच्च अदालत पाटनमा सुनुवाइ भइरहेको हुँदा, सो मुद्दामा अन्तिम फैसला मान्न नमिल्ने समेतको दाबी गरेका थिए ।
निर्वाचन आयोग, निर्वाचन अधिकृत, मुख्य निर्वाचन अधिकृतको तर्फबाट उपस्थित भएका सहमहान्यायधिवक्ता सञ्जिव रेग्मीले गुरुङको उमेदावरी प्रतिनिधिसभा सदस्य निर्वाचन ऐन, २०७४ बमोजिम नै खारेज गरिएको र गुरुङ निर्वाचनमा उमेदवार हुनको लागि अयोग्य रहेको बताएका थिए ।
बैंकिङ कसूरमा कालोसूचीमा नाम रहेको पाइएपछि निर्वाचन अधिकृतको कार्यालयले असोज २५ गते गुरुङको उम्मेदवारी खारेजी गरिदिएको थियो ।