सत्ता गठबन्धन बचाउनु नै अहिलेको आवश्यकता : प्रधानमन्त्री देउवा

बुटवल, ४ कात्तिक । नेपाली काँग्रेसका सभापति तथा प्रधानमन्त्री शेरबहादुर देउवाले गठबन्धन दलभित्र एक–अर्कालाई विश्वास दिलाउने गरी काम गर्न आग्रह गर्नुभएको छ । सभापति देउवाले सत्ता गठबन्धन बचाउनु नै अहिलेको आवश्यकता रहेको बताउनुभयो ।
भोलिका दिनमा गठबन्धनकै सरकार बन्ने र अबको दश बीस बर्षनै गठबन्धनबाट अघि बढ्ने समेत उहांको भनाइ छ । आगामी मंसिर ४ मा हुने निर्वाचनका लागि गठबन्धनभित्र कुनै पनि शंका–उपशंका वा बहाना नचल्ने उहांले बताउनुभयो ।
गठबन्धन दलले आज रुपन्देहीको तिलोत्तमा नगरपालिका योगिकुटी स्थित होटल पौवामा आयोजना गरेको संयुक्त प्रशिक्षण कार्यक्रममा बोल्दै सभापति देउवाले अझै केही वर्ष गठबन्धन आवश्यक रहेको र यसलाई बचाउनु पर्ने उल्लेख गर्नुभयो ।
यसमा कुनै शंका उपशंका गर्ने ठाउँ दिनुहुँदैन प्रधानमन्त्री देउवाले भन्नुभयो–‘अझै केही वर्षसम्म नेपालमा समावेशिता, संविधान र गणतन्त्र बचाउन गठबन्धन आवश्यक छ ।’ गठबन्धनको खिलाफमा कतिपयले भन्न थालिसके राजावादी तागत नै राष्ट्रवादी हो रे । हामी को अराष्ट्रवादी छौं यहाँ ? देउवाले प्रश्न समेत गर्नुभयो ।
‘लडेर ल्याउने हामी, अनि हामी नै अराष्ट्रिय हुनसक्छ ? त्यसकारण राजावादी राष्ट्रवादी होइनन् । राष्ट्रवादी पनि हामी हौं, लोकतन्त्रवादी पनि हामी हौं, समाजवादी पनि हामी हौं’, प्रधानमन्त्री देउवाको भनाइ छ ।
उहाले अगाडि भन्नुभयो , ‘लालसलाम पनि हामी हौं, जय नेपाल पनि हामी हौं ।’ अभिवादन पनि हामी हौं । गठबन्धनलाई कुनैपनि बहानामा शंका उपशंका गराउननहुने उहांको भनाइ छ । देउवाले कांग्रेसले सबैभन्दा बढी उदारता देखाएर गठबन्धनलाइ सफल बनाउनुपर्ने बताउनुभयो । ‘साथीहरुले मलाइ सम्मान गरेर प्रधानमन्त्री बनाउनुभएको हो, त्यसैले पनि गठबन्धन बचाउन कांग्रेसको अझै धेरै जिम्मेबारी छ, उहांको भनाइ छ ।
गठबन्धनले जितेर सरकार बनेपछि धेरै कुरा मिल्न सक्ने बताउँदै उहांले एक–आपसमा शंका र बेईमानी गर्दा ठूलो नोक्सानी व्यहोर्नुपर्ने भनि कार्यकर्तालाई सचेत गराउनुभयो । ‘आपसमा भ्रम भयो भने सबैभन्दा बढी क्षति हामीलाई नै हुन्छ ।’–देउवाले भन्नुभयो– ‘प्रचण्ड जिलाई पनि विश्वास दिलाउनु छ । शंका उपसंका नगरौं ।’