जनताको उम्मेदवारलाई न्याय दे भन्दै बुटवलमा डा. निकोलसका समर्थकहरुको धर्ना

बुटवल, २८ असोज । रुपन्देही निर्वाचन क्षेत्र नं. २ को निर्बाचन अधिकृतको कार्यालय अगाडी उम्मेदवारी बदर भएका हाम्रो नेपाली जनता पार्टीका उम्मेदवार डा. निकोलस भुसालका समर्थकहरु धर्ना बसेका छन् ।
स्वतन्त्र उम्मेदवार डा.कमल भुसाल (निकोलस) का समर्थक र लौरो अभियानका समर्थकहरु रुपन्देही क्षेत्र न २ कोे निर्वाचन अधिकृतकोे कार्यालय रहेकोे बुटवल उपमहानगरपालिकाकोे पुरानो भवनकोे गेटमा धर्नामा बसेका हुन् ।
सो धर्नामा निकोलसका बुबा तुलसीकुमार भुसाल,उनका दाजु सागर भुसाल लगायत (निकोलस) का समर्थक र लौरो अभियानका समर्थक बिभिन्न प्ले कार्ड प्रदर्शन गर्दै धर्नामा बसेका छन् ।
उनीहरुले निर्वाचन अधिकृत हो की आदेश पालक, निर्वाचन आयोग जनताकोे उम्मेदवार खै, रातारात हस्ताक्षर चोरी राज्य संयन्त्रमा कहाँबाट आयो घुसखोरी ? लेखेका प्लेकार्ड प्रदशर्न गरिरहेका छन् ।
उनीहरुले निकोलसकोे उम्मेदवारी कायम गर्न र आफ्ना उम्मेदवारलाई न्याय दिन अपिल समेत गरेका छन् । उनीहरुले निर्वाचन कार्यालयले गलत निर्णय गरेको आरोप समेत लगाएका छन् ।
निर्वाचन कार्यालयले उक्त पार्टीका उम्मेदवार डा. कमल भुसाल (निकोलस)को उम्मेदवारीमा उजुरी परेपछि छानविन गरी बदर गरेको थियो ।