बुटवल, ४ असोज । तोकिएको समयसीमाभित्र चुनावी खर्च विवरण नबुझाएका रुपन्देहीका १५ पालिका प्रमुखले निर्वाचन आयोगलाई जरिवाना तिर्नुपर्ने भएको छ । जरिवाना तिर्नुपर्नेमा बुटवल उपमहानगरपालिका प्रमुख खेलराज पाण्डेयसहित जिल्लाका १५ पालिका प्रमुख रहेका छन् ।
निर्वाचन आयोगले समयसीमाभित्र चुनावी खर्च विवरण आयोगमा नबुझाएको भन्दै बुटवल उपमहानगरपालिका प्रमुख खेलराज पाण्डेयलाई ५ लाख ५० हजार, सैनामैना नगरपालिका प्रमुख फणेन्द्र प्रसाद शर्मा, सिद्धार्थनगर नगरपालिका प्रमुख इश्तियाक अहमद खां, देवदह नगरपालिका प्रमुख धुव्रप्रसाद खरेल र लुम्बिनी सांस्कृतिक नगरपालिकाका प्रमुख सजरुद्दिन मुसलमानलाई ४ लाख ५० हजार रूपैयाँ जरिवाना तोकेको छ ।
आयोगले ओमसतिया गाउँपालिका, कञ्चन गाउँपालिका, कोटहीमाई गाउँपालिका, गैडहवा गाउँपालिका, मर्चवारी गाउँपालिका, मायादेवी गाउँपालिका, रोहिणी गाउँपालिका, शुद्धोधन गाउँपालिका, सम्मरीमाई गाउँपालिका र सियारी गाउँपालिकाका अध्यक्षलाई जनही ३ लाख ५० हजार रुपैयाँ जरिवाना ताकेको छ । रुपन्देहीमा १६ वटा स्थानीय तह (पालिका) रहेका छन् ।
रुपन्देहीका ५ नगरपालिकामध्ये तिलोत्तमा नगरपालिका प्रमुख रामकृष्ण खाँणले भने समयसीमा भित्रै निर्वाचन आयोगमा निर्वाचन खर्च विवरण बुझाएको आयोगले जनाएको छ ।
तिलोत्तमामा खाँणका निकटतम प्रतिद्वन्द्वी मोहन चापागाईंलाई पनि आयोगले समयमै निर्वाचन खर्च विवरण नबुझाएको भन्दै ४ लाख ५० हजार रुपैयाँ जरिवाना तोकेको छ । ६ महिनाभित्र जरिवाना तिर्नुपर्ने र सो समयभित्र जरिवाना नतिरे उनीहरुको पद जाने निर्वाचन आयोगले जनाएको छ ।
निर्वाचन आयोग ऐन दफा २६ को उपदफा १ अनुसार उनीहरूसहित १ लाख २३ हजार ६ सय २४ उम्मेदवारलाई कारबाही गर्ने निर्णय आयोगको छ । निर्वाचन परिणाम सार्वजनिक भएको ३० दिनभित्र विजयी तथा पराजित उम्मेदवारहरुले आयोगमा खर्च विवरण बुझाउनुपर्ने प्रावधान छ ।
त्यस अवधिभित्र विवरण नबुझाउनेहरूलाई आयोगले जरिवाना तिराउने निर्णय गरेको निर्वाचन आयोगले जनाएको छ । ८ हजार ६ सय ६६ जनाले तोकिएको समयावधिपछि निर्वाचन खर्चको विवरण बुझाएका आयोगले जनाएको छ ।
