भैरहवा, १२ भदौ । बहिरालाई दया होइन, अवसर देऊ भन्ने मुल नारालाई आत्मसाथ गर्दै बहिरा बाल माध्यमिक विद्यालय भैरहवा रुपन्देहीले सिप मुलक तालिम सुरु गरेको छ । विद्यालयमा सिप कार्यक्रम अन्तर्गत सिलाईकटाई तालिमको आइतबार एक कार्यक्रमका बिच सिद्धार्थनगर नगरपालिकाकी उपमेयर उमा अधिकारीले उद्घाटन गर्नुभयो । सो अवसरमा वोल्दै उपमेयर अधिकारीले राज्यले बहिरा बालबालिकालाई विशेष खालको व्यवस्था गर्नुपर्नेमा चुकेको भन्दै सिद्धार्थनगर नगरपालिकाले सक्दो सहयोग गर्ने प्रतिवद्धता जनाउनु भयो ।
शिक्षा क्षेत्रमा राज्यले लगानी गरे पनि सामुदायिक विद्यालयमा प्रगति कमी रहेकोले विशेष खालका विद्यालयलाई नगरपालिकाले सहयोग गर्न कुनै कमी नराख्ने सिद्धार्थनगर नगरपालिकाका कार्यकारी प्रमुख नबराज पौडेलले बताउनुभयो ।
अन्तर्राष्ट्रिय स्तरमा लायन्सले वातावरण, दृष्टि, क्यान्सर, भोकमरी र डाइबेटिजका क्षेत्रमा सहयोग गर्न निर्देशन गरेको र अहिले आएर सिपमुलक क्षेत्रमा काम गर्न पनि थालेको लायन्स क्लब अफ सिद्धार्थनगर ग्रिनसिटीका अध्यक्ष श्रीबहादुर रायमाझीले बताउनुभयो ।
बहिरा बाल माध्यमिक विद्यालयमा अहिले ३३ जिल्लाका २ सय ३५ जना विद्यार्थी अध्ययनरत रहेको प्रधानाध्यापक भिम बहादुर थापाले बताउनुभयो । बहिराहरुका लागि सिलाइकटाइ तालिम उत्तम रहेको र जिविकोपार्जन गर्न सहज हुने भएकोले तालिम सुरु गरिएको प्रधानाध्यापक थापाले बताउनुभयो ।
भैरहवामा रहेको बहिरा बाल माध्यमिक विद्यालय २०३२ सालमा स्थापना भएको थियो । स्थापनाकाल देखि नै विद्यालयमा नेपालको विभिन्न जिल्लाका बालबालिकाका साथै भारतको गोरखपुर सम्मका विद्यार्थी अध्ययनरत छन् ।
