बुटवल, १२ भदौ । राष्ट्रिय लोक तथा दोहोरी गीत प्रतिष्ठान नेपाल रुपन्देहीले बुटवल–१३ स्थित नेपाल अपाङ्ग आश्रममा आश्रीतहरुलाई तीजको दर खुवाएको छ । प्रतिष्ठानले शनिवार एक कार्यक्रमको आयोजना गरी आश्रीतहरुलाई तीजको दर खुवाउनुका साथै आश्रमलाई सहयोग समेत गरेको छ ।
आश्रीतहरुलाई दर खुवाउने तथा सहयोग हस्तान्तरण कार्यक्रमको प्रतिष्ठान रुपन्देहीका संरक्षक तथा केन्द्रिय पुर्व सल्लाहकार खिमबहादुर हमालले गमलामा पानी राखेर उद्घाटन गर्नुभएको थियो ।
सो अवसरमा बोल्दै संरक्षक हमालले प्रतिष्ठान रुपन्देहीले प्रत्येक वर्ष यस्तै रचनात्मक तथा सामाजिक उत्तरदायित्व अन्र्तगतका कार्यहरु गर्दै आएको बताउदै यसलाई निरन्तरता दिन आग्रह गर्नुभयो । आयोजक संस्था प्रतिष्ठान रुपन्देहीका अध्यक्ष दीपक कार्कीले कलाकारहरु कलाकर्ममा मात्रै नभएर सामाजिक उत्तरदायित्व अन्तर्गगत सामाजिक सेवामा पनि अग्रसर हुनुपर्छ भन्ने मान्यताका साथ यो कार्यक्रम गरिएको र आगामी दिनमा पनि यस्ता कार्यक्रमहरुलाई निरन्तरता दिदै जाने बताउनुभयो ।
सो अवसरमा प्रतिष्ठान रुपन्देहीले आश्रमका लागि आर्थिक सहयोग समेत गरेको छ । आश्रमका अध्यक्ष डोलराम बिश्वकर्मालाई प्रतिष्ठानका अध्यक्ष कार्की र कोषाध्यक्ष सन्जय सौगातले संयुक्त रुपमा चेक हस्तान्तरण गरेका थिए । कार्यक्रममा प्रतिष्ठानकी केन्द्रीय सदस्य सीता राना, लुम्बिनी प्रदेशका सल्लाहकार टंक गैरे, रुपन्देहीका सल्लाहकार समुन्द्र जि.सी, नारायण रायमाझी, प्रतिष्ठान लुम्बिनी प्रदेशका बरिष्ठ उपाध्यक्ष नारायण थापा, सह सचिव दामोदर बस्याल, आजीवन सदस्य जे.बि. क्षेत्री लगायतले प्रतिष्ठानले गरेका कार्यको प्रशंसा गर्नुभएको थियो ।
कार्यक्रममा प्रतिष्ठानका केन्द्रिय सदस्य दीपक गरौजा र रुपन्देही जिल्ला उपाध्यक्ष रितु थापाले गीत मार्फत उपस्थित सबैलाई मनोरन्जन प्रदान गरेका थिए । कार्यक्रम प्रतिष्ठान रुपन्देहीका अध्यक्ष दीपक कार्कीको अध्यक्षता, बरिष्ठ उपाध्यक्ष विजय सापकोटाको स्वागत र सह–सचिव विधान कार्कीको संचालनमा सम्पन्न भएको थियो ।
