बुटवल, २१ साउन । तिलोत्तमा–२ योगीकुटीस्थित शंकरनगर खानेपानी उपभोक्ता तथा सरसफई संस्थाको उपाध्यक्षमा केशवप्रसाद शर्मा तिवारी निर्वाचित भएका छन् ।
शनिबार सम्पन्न भएको उपनिर्वाचनमा विष्णु भण्डारीलाई २२ मत अन्तरले पराजित गर्दै तिवारी उपाध्यक्षमा निर्वाचित भएका हुन् । खानेपानी संस्थाका १०१ जना मतादातामध्ये ९७ मत खसेकोमा तिवारीले ५९ मत प्राप्त गरेका छन् भने भण्डारीले ३७ मत पाएका छन् । एक मत बदर भएको थियो ।
तिलोत्तमा नगरपालिकामा नेपाली कांग्रेस, नेकपा एमाले, नेकपा माओवादी र राष्ट्रिय जनमुक्ति पार्टी बिचको सहमतिअनुसार संस्थाको अधिबेशनमा उपाध्यक्ष पद कांग्रेसको भागमा परेको थियो । स्थानीय निर्वाचनमा संस्थाका उपाध्यक्ष डिलबहादुर भट्टराईले पदबाट राजीनामा दिई तिलोत्तमा–२ को अध्यक्षमा निर्वाचित भएपछि उपाध्यक्ष पद रिक्त भएको थियो ।
रिक्त उपाध्यक्ष पद नेपाली काँग्रेसको भागमा परेको भन्दै नेपाली काँग्रेस तिलोत्तमा नगर समितिले उक्त पदमा पार्टीको आधिकारिक उम्मेदवार विष्णु भण्डारीलाई अगाडी सारेको थियो । पार्टीले गरेको सिफारिस र निर्णय प्रक्रिया प्रति असहमति जनाउदै काँग्रेसकै तर्फबाट संस्थामा सल्लाहाकार रहेका तिवारीले पदवाट राजिनामा दिई सोही पदमा उम्मेदवारी दर्ता गराएपछि उपाध्यक्ष चयनका लागि निर्वाचन भएको हो ।
नेपाली काँग्रेसले सिफारिस गरेका आधिकारिक उम्मेदवार भण्डारीको पक्षमा सहमति जुटाउन र निर्वाचन प्रक्रियामा नजान अन्तिम समयसम्म प्रयास गरेपनि प्रयास सफल हुन नसकेपछि भएको उप निर्वाचनमा आधिकारिक उम्मेदवार भण्डारीलाई पराजित गरी तिवारी उपाध्यक्षमा निर्वाचित भएका हुन् ।
उप निर्वाचनका लागि संस्थाका सल्लाहाकारहरु हरिप्रसाद तिवारी संयोक तथा कमलप्रसाद पौडेल र बेलप्रसाद शर्मा सदस्य रहेको निर्वाचन समिति गठन गरिएको थियो । नव निर्वाचित उपाध्यक्ष तिवारीलाई शनिबार नै निर्वाचन संयोजक तिवारीले पद तथा गोपनियतताको सपथ ग्रहण र संस्थाका अध्यक्ष झबिन्द्र भण्डारीले पदवहाली गराएका थिए ।
