तिलोत्तमाकी वर्षाले दिइन् आफ्नै श्रीमान् मोहन बिरूद्ध जवर्जस्ती करणी उजुरी

तिलोत्तमा, १७ साउन । रूपन्देहीको तिलोत्तमा १७ की बर्षाकुमारी चौधरीले आफ्नै श्रीमान् बिरूद्ध जवर्जस्ती करणी गरेको भन्दै प्रहरीमा उजुरी दिएकी छन् ।
बर्षाले इलाका प्रहरी कार्यालय बुटवलमा उजुरी दिएकी हुन् । इलाका प्रहरी कार्यालय बुटवलका प्रमुख प्रहरी नायव उपरीक्षक ठगबहादुर केसीले बर्षाकुमारी चौधरीले श्रीमान् बिरूद्ध जवर्जस्ती करणी गरेको उजुरी दिएको पुष्टि गरे । उनले उजुरीका विषयमा थप अनुसन्धान गरिने बताए ।
तिलोत्तमा नगरपालिकाकी उपप्रमुख जागेशवरी देवी चौधरीकी बुहारी वर्षाले यसअघि आफ्ना श्रीमान् मोहन थारुले दैनिक रुपमा लागुपदार्थ सेवन गरी कुटपिट गर्ने, गाली बेइज्जती गर्ने र मानसिक यातना दिने गरेको भन्दै इलाका प्रहरी कार्यालय मंगलापुरमा उजुरी दिएकी थिइन् ।
श्रीमानले कुटपिट गरेर बर्षाको शरीरमा घाउ चोट समेत लागेको छ । मोहनले दैनिक लागुपदार्थ सेवन गर्ने,गाँजा भर्न लगाउने,शारीरिक तथा मानसिक तनाव दिँदा घरका सासु ससुराले समेतले बेवास्ता गरेको बर्षाले प्रहरीसमक्ष बताएकी छन् ।
गाडी चलाउने काम गर्ने श्रीमान् मोहनले घरखर्च नदिने, यातना दिने र सासु जागेश्वरी एवं ससुराले समेत बेवास्ता गर्दा आफूले बच्चाको लालनपालनमा समस्या भोगेको वर्षाले प्रहरीलाई बताएकी छन् ।