भैरहवा, १६ साउन । जिल्ला प्रहरी कार्यालय रुपन्देहीले १० लाख बढिको अवैध सामान बरामद गरेको छ ।
भारतबाट भन्सार छली चोरी पैठारी गरी नेपाल तर्फ ल्याउंदै गरेको उक्त मूल्य बराबरको अवैध सामान प्रहरीले रुपन्देहीको ओमसतिया गाउँपालिका वडा नं. २ पडसरीबाट बरामद गरेको हो ।
गोप्य सूचनाका आधारमा खटिएको प्रहरी टोलीले जिल्ला कास्की पोखरा महानगरपालिका वडा नं. २३ बस्ने बर्ष २७ को दामोदर चापागाई चालक र जिल्ला स्याङ्जा वालिङ नगरपालिका वडा नं. १४ बस्ने बर्ष २८ को विशाल तिवारी सवार रहेको ग २ च ४६९७ नं. को गाडीमा लोड गरी ल्याउंदै गरेको रेडवुल ११२ कार्टुन ( ३०० पिस ), बदाम जुस १५४ कार्टुन (१८४८ पिस) र गाडी सहित मुल्य १० लाख १५ हजार १२० बराबरको सामान स्थानीय मानिसको रोहवरमा बरामद गरेको हो । बरामद सामान, गाडी र मानिसहरुलाई आवश्यक कारवाहीको लागि भन्सार कार्यालय वेलहिया पठाइएको जिल्ला प्रहरी कार्यालयका सहायक सूचना अधिकारी प्रहरी निरीक्षक बेदबहादुर पौडेलले जानकारी दिए ।
स्रोत नखुलेको १२ लाख ५० हजार नगद बरामद
रुपन्देही प्रहरीले स्रोत नखुलेको १२ लाख ५० हजार नगद रुपैयाँ बरामद गरेको छ । ईलाका प्रहरी कार्यालय बेलहियाबाट खटिएको प्रहरी चेकिङ टोलीले लु ६ प ७१२९ नम्वरको मोटर साईकल चालक भारत उत्तर प्रदेश जिल्ला महाराजगंज जुगौली बस्ने वर्ष ४६ को आशी शाहको साथबाट १००० र ५०० दरको नोट वरामद गरेको हो । शाहको साथबाट स्रोत नखुलेको नेपाली रुपैयाँ रु. १००० दरका ११०० थान रु. ११ लाख र रु. ५०० दरका ३०० थान रु. १ लाख ५० हजार गरी कूल नेपाली रु. १२ लाख ५० हजार बरामद गरेको हो । बरामद रकम, मानिस र मोटरसाइकल आवश्यक कारवाहीका लागि भन्सार कार्यालय बेलहिया पठाइएको प्रहरीले जनाएको छ ।
