इन्जिनमा खराबी देखिएपछि उडेको ६ मिनेटमै यतिको विमान पोखरामा अवतरण

काठमाडौं, १३ साउन । उडे लगत्तै इन्जिनमा खराबी देखिएपछि यति एयरलाइन्सको विमान पोखरामा आकस्मिक अवतरण गरिएको छ ।
पोखरा विमानस्थलबाट शुक्रबार विहान ८ ४५ बजे काठमाडौंका लागि उडेको यति एयरको इन्जिनमा खराबी आएपछि पुनः पोखरा फर्काएर आकस्मिक अवतरण गरिएको हो । उडेको केहीबेरमै यति एयरको बायाँ इन्जिनमा खराबी आएको क्याप्टेनले जानकारी गराएका थिए ।
पोखराबाट ४५ जना यात्रु लिएर काठमाडौंका लागि उडेको विमानमा उडेलगत्तै खराबी देखिएपछि ग्राउण्ड खाली गराएर सकुशल अवतरण गराइएको पोखरा विमानस्थलका सूचना अधिकारी देवराज सुवेदीले जानकारी गराए । उडान भरेको ६ मिनेटमै अवतरण भएको विमानका सबै यात्रु सकुशल रहेका छन् । यति एयरलाइन्सका अनुसार विमानका क्याप्टेनका कारण विमान सफल अवतरण गर्न सफल भएको हो ।