छाडा चौपाया ब्यबस्थापनका लागि तिलोत्तमाको गौशालालाई पिकअप गाडी

तिलोत्तमा, ८ साउन । रुपन्देहीको तिलोत्तमा नगरपालिकाले छाडा चौपाया ब्यवस्थापनकालागि तिलोत्तमा स्थित गौशालालाई गाडी उपलब्ध गराएको छ ।
नगर क्षेत्रभित्र रहेका छाडा चौपाया (गाईबस्तु ) ब्यबस्थापन गर्न सहज होस् भन्ने उद्देशयले नगरपालिकाले तिलोत्तमा ८ र ११ को सिमानामा रहेको तिलोत्तमा गौशालालाई आईतबार एक कार्यक्रमका विच गाडी हस्तान्तरण गरेको हो ।
तिलोत्तमा नगरपालिकाका नगर प्रमुख रामकृष्ण खाँण, नगर उपप्रमुख जगेश्वर देवी चौधरीले छाडा चौपाया ब्यबस्थापनका लागि पिकअप गाडी र गाडीको साँचो तिलोत्तमा गौशालाका रन्तिदेव दासलाई हस्तान्तरण गर्नुभएको हो ।
गाडी हस्तान्तरण कार्यक्रममा बोल्दै नगरप्रमुख खाँणले सडकमा छाडिएका पशु गाई बस्तुको सहज ब्यबस्थापन गर्न सघाउ होस् भनेर गौशालाका लागि गाडी हस्तान्तरण गरिएको बताउनुभयो । नगर प्रमुख खाँणले गाडीको प्रयोगले पशु चौपायाको ब्यबस्थापन र दाना पानी बोक्न तथा सडकमा छाडिएका गाईबस्तु गौशाला सम्म पुर्याउन सहयोग पुग्ने बिश्वास ब्यक्त गर्नुभयो । कार्यक्रममा तिलोत्तमा नगरपालिकाका कार्यपालिका सदस्य राधा शाही ठकुरी, वडा नम्बर १ का अध्यक्ष फर्शुराम गिरी, शिक्षा शाखा प्रमुख गंगाराम आचार्यलगायत विभिन्न शाखागत कर्मचारीहरुको सहभागिता रहेको थियो ।